येता जाता

तू हसतोस

2012-01-09T01:02:00.002+05:30

(छायाचित्र सौजन्य: वैभव )

तू हसतोस..
आणि सुगंध पसरतो
चोहिकडे, दिशादिशांत, नसानसात
रोमकाटा होतो

तू उरतोस...
मनाच्या सर्व पाकळ्यांमधे
मन उमलू लागते, फुलते
प्रसन्न होते

तू असतोस..
आसपासच
जाणवतात नेहमी पदन्यास
डोळे मिटताच अणुभवते मी
तुझेच श्वास

तू हसतोस…
आणि करतोस
माझे जगणे निरामय
तू औषध आहेस रे
माझ्या जगण्याचे

तुषार जोशी, नागपूर
१० जानेवारी २०१२, ०१:००
+९१ ९८२२२ २०३६५

माझा आवडता छंद

2011-12-23T09:15:00.002+05:30

(छायाचित्र सौजन्य: प्रज्ञा )

तुला पहिल्यांदा जेव्हा पाहिले
माझे तुझ्या सोबत आयुष्य
त्या क्षणापासूनच सुरू झाले
त्या क्षणापासून जी तुझी नशा झालीय
तो प्रभाव कायमच नाही तर
वर्षोंवर्षे तुझी नशा वाढतच चाललीय
तुझ्यासोबत घालवलेला
प्रत्येक क्षण
आठवणींच्या दागिन्यातला
एकेक हिरा आहे
तुझे अस्तित्व प्रीतीचा
शुद्ध आनंद झरा आहे
तुझ्या रूपाचे अनेक पैलू पाहणे
माझ्यासाठी रम्य उत्सव आहे
तुझ्या सोबत हे आयुष्य जगणे
मोहक उत्कट अनुभव आहे
प्रत्येक वर्षी विचार करतो की
आपले नेमक्या वेळी त्याच जागी जाणे
योगायोग नव्हता
एकमेकांना पाहून वेड्यासारखे भारावणे
योगायोग नव्हता
मी तुझ्यासाठी तू माझ्यासाठीच जगात होतीस
प्रथम दर्शनी मी तुझा होणे
योगायोग नव्हता
तुझा होऊन जगणे म्हणजे
माझा आवडता छंद आहे
तू माझी असताना जगणे
म्हणजे अपार आनंद आहे

तुषार जोशी, नागपूर
२३ डिसेंबर २०११, ०९:००

(प्रिय प्रज्ञा आणि मंदार, तुम्हाला लग्नाच्या १४व्या वाढदिवसासाठी अनंत शुभेच्छा)

कविता

2011-12-21T23:54:00.003+05:30

(छायाचित्र सौजन्य: प्रांजल )

टपोरे गहिरे डोळे
डोळ्यात कोरिव काजळ
घनदाट काळे केस
चाफेकळीसे नाक
अल्लड लोभस गाल
ओठात मिश्किल हसू
मोत्यासारखे दात
गोऱ्या त्वचेवर खुलणारा काळा गोफ
मोहक काळा ड्रेस
कपाळावर नाजुकशी टिकली
हनुवर छोट्टासा तीळ
मानेवर रूळणाऱ्या अवखळ बटा
किरणांची उनसावली छटा
हे सगळे एकाच वेळी
एकत्र आलेली कविता पाहून
.
धडधडणारे हृदय
देहभान हरवलेला
मंतरलेला एक वेडा जीव
कविता लिहू लागेल
यात नवल काय?

तुषार जोशी, नागपूर
२१ डिसेंबर २०११, २४:४५

तिचे हासणे जीव घेऊन गेले

2011-12-16T09:52:00.000+05:30

(छायाचित्र सौजन्य: वैदेही )

तिचे हासणे जीव घेऊन गेले
तिने टाळणे जीव घेऊन गेले

खुले केस सोडून लाडीक होणे
तिचे वागणे जीव घेऊन गेले

स्वप्नामधे हात हाती धरूनी
तिचे चालणे जीव घेऊन गेले

डोळ्यातली प्रीत सांगू कशी मी
इथे भाळणे जीव घेऊन गेले

मला वाटते मित्र माझा खरा तू
तिचे सांगणे जीव घेऊन गेले

तुषार जोशी, नागपूर

असे वाटते

2011-12-10T00:37:00.001+05:30

(छायाचित्र सौजन्य: नम्रता )

तू माझ्या आयुष्यात आलीस
सौंदर्याची लाट होऊन
तू माझी प्रेरणा झालीस
सोनेरी पहाट होऊन

तुझा सावळा रंग झाला
माझा आवडता रंग
तुला भेटणे सहजच झाला
गोड अविस्मरणीय प्रसंग

तू सांगितलेस सर्व तुझे
काही सुखं काही वेदना
तू कधीच आणला नाहीस
आनंदाचा आव उसना

तू नितळ पाण्यासारखी
नेहमी समोर येत गेलीस
तुझ्या खरेपणामुळेच तू
माझी सखी होत गेलीस

काठोकाठ डोळा भरून
तू हसतेस म्हणूनच पण
असे वाटते तुझ्यावरून
ओवाळावा प्रत्येक क्षण

तुषार जोशी, नागपूर

आश्चर्याची झालर

2011-10-27T10:38:00.001+05:30

(छायाचित्र सौजन्य: मनाली )

रोज एका नव्या रुपात
समोर येतेस तू
रोज एक नवा अनोखा
आनंद देतेस तू

रोज नवेच रूप पाहून
मी विचार करतो
तू आहेस अथांग, मलातर
फक्त थेंबच दिसतो
आश्चर्याची झालर असलेली
लाट होतेस तू
रोज एक नवा अनोखा
आनंद देतेस तू

मी ठरवतो तुला बघून
अचंभित नाही व्हायचे
तुझे कातिल हावभाव
कसले निर्णय टिकायचे
हृदयाच्या आत खोल
घुसत जातेस तू
रोज एक नवा अनोखा
आनंद देतेस तू

तुषार जोशी, नागपूर

ती हसल्यावर

2011-10-04T23:55:00.000+05:30

(छायाचित्र सौजन्य: प्राची)

ती हसल्यावर वार किती होती
काळजावरती काळजावरती
ती दिसल्यावर तिच्या कडे सगळ्या
नजरा ठरती नजरा ठरती

किमया मादक तरी निरागस
सात्विक तरीही राजस राजस
कसे गुलाबी सुगंध पेरीत येते
आणिक काबिज करून जाते
अवघी धरती अवघी धरती

ती हसल्यावर वार किती होती
काळजावरती काळजावरती

खळी असावी किती मनोरम
केस जणु ते रेशम रेशम
तरूण बिचारे भान हरपुनी
खुळ्या सारखे रोज
तिच्यावर मरती तिच्यावर मरती

ती हसल्यावर वार किती होती
काळजावरती काळजावरती

तुषार जोशी, नागपूर

काही चेहेरे

2011-10-04T09:58:00.002+05:30

(छायाचित्र सौजन्य: गिरिष)

काही चेहरे स्नेहाचा संदेश सांगतात
काही चेहरे प्रगल्भतेचे कोष वाटतात
लक्षात राहतात भेटल्यावरती काही चेहरे
काही चेहरे पाहताक्षणीच छाप पाडतात

काही चेहरे दिसले की मन शांत राहते
काही चेहरे हसतील तेव्हा सुख दाटते
हवेच असतात जवळ नेहमी काही चेहरे
काही चेहरे बोलतात तेव्हा धन्य वाटते

काही चेहरे प्रामाणिक प्रशस्त वाटती
काही चेहरे सत्याची देतात पावती
सभोवताली व्यापुन उरती काही चेहरे
काही चेहरे तर डोळ्यांनीच शिस्त लावती

भाग्यवान तो असा चेहरा ज्यास मिळाला
मित्रा तुझा चेहरा म्हणजे एक त्यातला

तुषार जोशी, नागपूर

तुला कोणी सांगितलेय का गं?

2011-10-02T10:46:00.001+05:30

(छायाचित्र सौजन्य: मयुरी)

तुझ्याबद्दल बोलायचे झाले तर 

माझे शब्द वेड्यासारखे वागतात

तुला कोणी सांगितलेय का गं? 

तुला बघुन अप्सरा पण लाजतात.

श्वास थांबतो हृदयाचा ठोका चुकतो 

मनामध्ये मोर थुई थुई नाचतात

तुला कोणी सांगितलेय का गं? 

मेघ तुला बघायलाच दाटतात.

तुला कितीदा पण पहिले तरी

ते क्षण नेहमी कमीच वाटतात 

तुला कोणी सांगितलेय का गं? 

तू नसतानाचे क्षण किती जाचतात

तुझा विचारही मनात येतो जेव्हा

मनात अत्तराची तळी साठतात

तुला कोणी सांगितलेय का गं? 

तू येताच चोहिकडे सतारी वाजतात

तू हसतेस, डोळ्यांचे पारणे फिटते 

चैतन्याचे वारे वाहू लागतात 

तुला कोणी सांगितलेय का गं?

लोक प्रार्थनेत तुझे दिसणे मागतात

तुषार जोशी, नागपूर

काय आवडतं

2011-10-01T23:07:00.002+05:30

(छायाचित्र सौजन्य: संहिता)

तू विचारायचीस
काय आवडतं माझ्यातलं
मी म्हणायचो नाक
ते आहे एक लाखातलं

तेव्हा एक सांगायचं
राहूनच जायचं
तुझ्या डोळ्यांबद्दल बोलायचं
राहूनच जायचं

आणि तुझं मोठ्ठ कपाळ
ते मिश्किल ओठ
आणि ते तुझं माझ्याकडे
त्वेषाने रोखलेलं बोट

काय काय सांगायचं गं
आणि कसं शब्दात बांधायचं
तुझ्यात जे भरून ठेवलय बाप्पाने
काही कवितांत कसं मावायचं

म्हणूनच म्हणायचो नाक
ते आहे एक लाखातलं
माझ्या मैत्रीणी सारखं
कुण्णालाच नाही मिळालेलं

तुषार जोशी, नागपूर

निराळी दिसते ती

2011-10-01T22:14:00.002+05:30

(छायाचित्र सौजन्य: प्रेक्षा )

निखळ निरागस प्रसन्न हसते ती
सर्वांमधे उठून निराळी दिसते ती

तिला भेटतो तेव्हा निराशा दूर पळे
उडून जाई किती वेळ तो नाही कळे
नेहमी चैतन्याच्या धुंदीत असते ती
सर्वांमधे उठून निराळी दिसते ती

सावळा रंग तिला मोहक छटा देतो
गोडवा गाली तिच्या स्वतःचा अर्थ घेतो
प्रेमळ साधी सोपी नेहमी भासते ती
सर्वांमधे उठून निराळी दिसते ती

स्वप्नांच्या बाबतीत वेडी आहे जराशी
त्यांचे थवेच्या थवे असती तिच्या पाशी
स्वप्नांना सजवित खुशाल बसते ती
सर्वांमधे उठून निराळी दिसते ती

तुषार जोशी, नागपूर

वाट पाहते

2011-09-30T11:20:00.001+05:30

(छायाचित्र सौजन्य: प्रांजल)

स्वतःला आरशात पहावे मीच किती
वाट पाहते तुझी येना रे भेटीसाठी

सुर्य होऊन येना तळप माझ्या नभी
डोळ्यांची आरती मी घेऊन आहे उभी
साक्षात होऊन ये स्वप्ना मधली प्रीती
वाट पाहते तुझी येना रे भेटीसाठी

केसांना फिरणाऱ्या हातांची ओढ आहे
ओठात दाटलेले अमृत गोड आहे
येता विचार तुझा लाली गालावरती
वाट पाहते तुझी येना रे भेटीसाठी

तुझ्यासाठी जपले सजले रूप माझे
रूपास टिपताना पाहूदे डोळे तुझे
हातांना विणू दे रे जन्मोजन्मीची नाती
वाट पाहते तुझी येना रे भेटीसाठी

तुषार जोशी, नागपूर

स्वतःने स्वतःच्याच प्रेमात पडणे

2011-09-30T07:50:00.000+05:30

(छायाचित्र सौजन्य: मनाली साटम)

तिला पाहते आरशाच्या पल्याडं
तिचे रूप आहे किती देखणे
खुले केस मोहून जाती मनाला
सुगंधी जसे की फुले वेचणे

असे रोज होते किती वेळ जातो
किती आरशाच्या पुढे नाचणे
स्वतःने स्वतःच्याच प्रेमात पडणे
खुळ्यासारखे चालणे वागणे

तिच्या स्वप्निचा तो कुणी राजबिंडा
तिचे रूप आसावले पाहण्या
पहावे तयाने भुलावे तयाने
तिने बद्ध व्हाने उगा लाजण्या

कधी स्वप्न वाटे कधी लाज वाटे
किती मोहरावे मनाने असे
किती प्रेम द्यावे, स्वतःला हरावे
हसावे कळीने फुलावे जसे

बघावे स्वतःला स्मरावे कुणाला
कुठे दूर आहे सखा साजणं
जरी दूर आहे किती घोर आहे
तिला होतसे रात्रीचं जागणं

तुषार जोशी, नागपूर
१२ मे २०११, २२:५०

हनुचा तीळ

2011-09-30T07:34:00.002+05:30

(छायाचित्र सौजन्य: मनाली)

केसांच्या ढगातून चेहऱ्याचा चंद्र दिसे
चांदणे रूपाचे गं हृदयावरती ठसे

स्वप्नाळू खोल डोळे अधिर ओठ किती
हनुचा तीळ काळा नजरेची नाही भीती

नाकाची चाफेकळी सजली ऐटी मधे
सावळी गोड कांती अनोखी लाखा मधे

उत्सव सौंदर्याचा तुझ्या रूपात चाले
साठवू कुठे किती दोनच माझे डोळे

तुषार जोशी, नागपूर

तुला पाहता

2011-09-30T01:23:00.001+05:30

(छायाचित्र सौजन्य: अदिती )

.
.
तुला पाहता जीव वेडावतो गं तुला पाहता
सुखाचा झरा का उरी वाहतो गं तुला पाहता?

तुझे केस सोडून ते मोकळे तू मला भेटता
उन्हाळ्यातही गारवा भासतो गं तुला पाहता

तुझा सावळा रंग आहे तुझा देखणा दागिना
मधाचा मधू गोडवा लाजतो गं तुला पाहता

तुझे हासणे ओतते धूंद तारूण्य चोहीकडे
पहा मंद वारा कसा नाचतो गं तुला पाहता

तुझे ओठ सांगून जाती मुक्याने हवे ते मला
जिवाचा शहारा पुरा पेटतो गं तुला पाहता

तुझे रूप वेधून घेते मनाला खुळ्या सारखे
तुझी साथ लाभो सदा मागतो गं तुला पाहता

तुषार जोशी, नागपूर
.
.

भूल भुल्लैया

2011-09-28T19:22:00.003+05:30

(छायाचित्र सौजन्य: मनिषा कोरडे)

तुझ्या सोनेरी केसांची मनमोही हालचाल
तुझे हसणे मिळेल ज्याला तोच 'मालामाल'

तुझ्या डोळ्यांच्या तळ्यात 'भूल भुल्लैया' गहिरी
अजूनही चिंब तुला जरी बघितले काल

आता सगळे सांगती राम्या शाम्या गंप्या 'बिल्लू'
तुझ्या कटाक्षाने होती कसे हृदयाचे हाल

तुषार जोशी, नागपूर

तुझ्या मंद हसण्याने

2011-09-28T19:13:00.001+05:30

(छायाचित्र सौजन्य: मनिषा कोरडे)

हसलिस हलक्याने
जिव झाला कासाविस
असे वाटले जवळ
नेहमिच तू हवीस

तुझ्या सावळ्या रंगाची
ओढ होतीच मनाला
तुझ्या मंद हसण्याने
वेड लागले जिवाला

हसतच तू रहावे
आनंदाचे गावे गाणे
मान्य आहे कण कण
माझा त्यासाठी झिजणे

तुषार जोशी, नागपूर

माझी सावळी मैत्रीण

2011-09-13T21:35:00.003+05:30

(छायाचित्र सौजन्य: नीलम नायक)

माझी सावळी मैत्रीण
रोज मला विचारते
गोरा तू मी सावळी रे
कशी तुला आवडते?

तिला सांगतो मी वेडे
करतेस काय अशी
तुझ्या सावळ्या रंगात
ओढ हवीशी हवीशी

तुझ्या असण्याने होते
माझे जगणे मंगल
तू नसता जग आहे
नको नकोसे जंगल

कस्तुरीला सुगंधाचे
जसे स्रोत नाही ज्ञात
तुझ्या सावळ्या रंगाचे
तुला मूल्य नाही ज्ञात

ईतकेच ठेव ध्यानी
तुझे सावळे असणे
माझ्यासाठी ठरते गं
जग मोहक देखणे

(सावळ्या मुलीची गाणी / तुषार जोशी, नागपूर)

चंगो

2011-09-09T00:07:00.001+05:30

(छायाचित्र सौजन्य: चंद्रशेखर गोखले)

.

ऐन आमच्या तारूण्यात तो
थेट आमच्या हृदयात आला
आमच्या कितेक भावनांना
त्याने हळवा शब्द दिला

त्याच्या शब्दांवर प्रेम जडलं
त्याच्या शब्दांनीच प्रेम फुललं
त्याच्या शब्दांनी तिच्या मनातलं
कितीदा तरी गुपित कळलं

त्या चारोळ्या तिला ऐकवून
हेच मला वाटतं म्हणायचं
त्याच्या शब्दांचं फूल असं
तिच्या मनात हळूच खोवायचं

त्याच्या प्रत्येक शब्दात आम्हाला
खोल जगणे सापडत जाते
आमच्या रसिक हृदयामध्ये
त्याची आठवण तेवत रहाते

तुषार जोशी, नागपूर

सखे

2011-08-05T21:21:00.003+05:30

(छायाचित्र सौजन्य: रिधिमा - निशिधा )

तुझ्या माझ्यातले
सख्य सांगू कसे
शब्द पडती अपुरे सखे
सुख तुला पाहुनी
पास रेंगाळते
दुःख होते मधासारखे

विश्व माझे तुझे
सागरासारखे
वाद होती कधी वादळी
फक्त डोळ्यातुनी
गूज समजायचे
बोलण्याची कला वेगळी

मीच समजायच्या
तुझ्या खाणाखुणा
खुट्ट झाले तरी जाणवे
वेदना पण कशी
वाटली जिंकली
जाणती आपली आसवे

वेगळा कोपरा
आत हृदयामधे
तुझ्यासाठी असे राखला
या इथे त्या तिथे

पोचले मी कुठे
साथ ठेवीन गं मी तुला

तुषार जोशी, नागपूर

अलामांडा

2011-08-04T09:09:00.000+05:30

(छायाचित्र सौजन्य: सोनल)

घंटेची पिवळी फुले पाहिली होती
कधी लक्षात राहिली नव्हती
पण तू त्या दिवशी
एक फुल खोवलेस केसात
तेव्हापासून ते फूल विसरू शकलेलो नाही.
आता जिव हळवा होतो
घंटेची फुले पाहिल्यानेही.
आता घंटेची फुले
माझ्या अनुभव विश्वाचा
गोड भाग झालीयेत.
प्रत्येक वेळा
घंटेची फुले पाहता
ती तुझ्या आठवणींची
मनोहर झुळुक घेऊन आलियेत.
माझ्या आयुष्यात तू त्या फुलांना
वेगळे अस्तित्व दिलेस
ते फुल केसात खोवून
तू सौंदर्याचे दालन उघडे केलेस.
त्या फुलाला नवे अस्तित्व
आणि मला डोळाभर धन दिलेस.

(हो हो 'फुले पक्षी ती आणि मी' ही मंगेश पाडगावकरांची कविता मला माहित आहे, या कवितेची कल्पना त्या कवितेशी बरीच मिळते तरीही या कवितेतले अनुभव व भाव माझे आहेत)

तुषार जोशी, नागपूर

सावळी ती परी

2011-08-03T23:58:00.001+05:30

(छायाचित्र सौजन्य: सोनल काळबांडे)

स्वप्नात ती दिसावी मिटताच डोळे
दिवसा तिचेच व्हावे आभास भोळे
दिवसा तिचेच व्हावे आभास भोळे
एक सावळी ती परी, मनमोहिनी सावरी
मनमोहिनी सावरी, एक सावळी ती परी ।। ध्रु ।।

रंगास तोड नाही, रूपास तोड नाही
शब्दच अपुरे पडती, पडती अपुरे
सागर तिच्या रूपाने, माझ्या समोर येई
सगळे किनारे भिजती, भिजती किनारे
हसताच ती प्रभेने दिपतात डोळे
विणतो सुगंध अंगी रोमांच जाळे
विणतो सुगंध अंगी रोमांच जाळे
एक सावळी ती परी, मनमोहिनी सावरी
मनमोहिनी सावरी, एक सावळी ती परी ।। १ ।।

कुरळ्या तिच्या बटांना, देता ती एक झटका
अडतो तिथेच श्वास, अडतोच श्वास
बघते ती ज्या कुणाला, त्याची असे दिवाळी
खासच जातो दिन तो, जातोच खास
बुडतो सहज कुणीही गहिरे ते डोळे
स्मरणात तिचिया जगणे जगणे निराळे
स्मरणात तिचिया जगणे जगणे निराळे
एक सावळी ती परी, मनमोहिनी सावरी
मनमोहिनी सावरी, एक सावळी ती परी ।। २ ।।

(सावळ्या मुलीची गाणी / तुषार जोशी, नागपूर)

फेयर अॅड लवली

2011-07-31T07:12:00.000+05:30

(छायाचित्र: मोहिनी जोशी)

.

टिव्ही मधे दाखवती गोरे गोरे रंग
क्रीम कोणते मी लावू गोरे होण्या अंग
मला पण हवा माझा चेहरा चांगला
फेयर अॅण्ड लवली आणून देना बाबा मला

तुझा आहे तोच रंग गोड आहे बेटा
रंग बदलण्याचा नको ग आटापिटा
रंग जो मिळाला जन्मताना आपल्याला
तोच रंग छान रंग तोपण चांगला
बागेमध्ये मोगऱ्याची फुले असती ना
गुलाबाची पण असतात काय हो ना
गुलाबाने मोगरा व्हायचे नसते गं
गुलाबाचे वेगळे सौंदर्य असते गं
आवडतेस तू आहे तशीच आम्हाला
रंग गोरा करण्याचा विचार कशाला

जाहिरात दाखवावी लागतेच त्यांना
खोटी स्वप्ने विकायची असतात ज्यांना
गोरे छान काळे घाण म्हणावे लागते
पुन्हा पुन्हा तेच तेच सांगावे लागते
जगामध्ये सावळेसे बघ किती लोक
गोरे तर थोडे काळे सावळे अधिक
बदकांच्या सौंदर्याची व्याख्या ही वेगळी
चिमणीने तुलनाच करू नाही मुळी
सावळ्या रंगाची गोड गुणाची देखणी
तू आमुची अलौकिक सावळी चिमणी

सावळ्या रंगाचा पोरी अभिमान ठेव
त्याला आवडते तेच बनवतो देव
रंग गोरा रंग काळा आणिक सावळा
सगळेच त्याने बनवले हो ना बाळा?
सगळेच रंग छान असतात बघ
कुणाचाही करू नये द्वेष किंवा राग
लक्ष देऊ नये जर चिडवले कोणी
आपल्याच तालामध्ये म्हणायची गाणी
कितीतरी लोक पुढे भेटतील तुला
भाळतील बघ तुझ्या सावळ्या रंगाला

(सावळ्या मुलीची गाणी / तुषार जोशी, नागपूर)

योजना

2011-07-30T21:46:00.000+05:30

(छायाचित्र सौजन्य: रिधिमा कोटेचा)

तुला पाहिले अन मानायला लागलो
देव आहे! तुला घडवलेय ग त्याने
तुझ्या लावण्यात स्वर्गीय हात आहे
शक्यच नाही घडणे योगायोगाने

योजना केलीय त्याने जाणीवपूर्वक
हासण्यात तुझ्या उत्कट चैतन्य पेरून
त्याचा अंश जगात फिरत ठेवण्याची
शल्ये विरती तुला पाहूनच दूरून

मग माझी योजना का केलीय गं
रूप साठवायला पण कुणी हवे ना
म्हणूनच कदाचित वाटत राहतं
जगूच शकणार नाही तुझ्या विना

तुला पाहिताच मी आस्तिक झालो
मी देवाचा बघ किती लाडका असणार
तुला त्याने माझ्याच काळात घडवले
त्याचे हे उपकार कधी ना विसरणार

माझ्यासाठी तूच त्याचा अंश आहेस
तुझा भक्त झालोय स्वीकार आता
तुझी साथ मोक्ष तुझी साथच स्वर्ग
लागली समाधी तुझेच गीत गाता

तुषार जोशी, नागपूर

रूप

2011-07-30T13:40:00.000+05:30

(छायाचित्र सौजन्य: शर्वरी राणे)

तुझे सुबक नाक वेडे करते मला
तुला पाहण्याचाही सोहळा होतो
पण तुझ्या सोज्वळ स्वभावाचा
प्रभाव उत्कट जगावेगळा होतो

तुझे हसताना दिसणारे दात ना
मला मोत्यांचा दागिना वाटतो
मनापासून तुझ्या काळजी करण्याने
मनात स्नेहाचा परिमळ दाटतो

तुझे केस वाऱ्यावर उडतात ना
वाटते माझे जगणे ईथेच थांबावे
तू माझ्यासाठी हाताने केलेले
थालीपीठ तुझ्याच हाताने खावे

तुझे डोळे अन त्यातले पाणी
चिंब भिजवते जीव होतो हळवा
तुझ्या आकाशात उडताना दिसतो
माझ्या वचनांचा स्वप्नांचा थवा

सावळ्या रंगाचे काय बोलू गं
काय बोलू आता नाजुक बोटांचे
रूप साठवून ठेवतोय मनात
जणू मिळालेय धन जन्मभराचे

तुषार जोशी, नागपूर

वेंधळा साजण

2011-07-29T07:56:00.000+05:30

(छायाचित्र सौजन्य: रिद्धिमा कोटेचा)

कधी कधी अशी भीती वाटते की आपण सौंदर्याला शब्दात बांधून आपल्याच शब्दांच्या मर्यादेत त्याला बांधू तर पहात नाही? सौंदर्य सागरासमान आणि आपले शब्द फक्त थेंब रूप आहेत. यावेळेस सौंदर्याला बांधून घालायची ईच्छाच होत नाहीये, तर एका खुळ्या वेंधळ्याची कल्पना शक्ती प्रक्षेपित करूनच हौस भागवतोय.

तुला पाहिले साडीत
आणि जागी ठार झालो
तुझ्यासाठी खुळा होतो
आता वेडा पार झालो

थोडे मराठी दागिने
तुला आवडतील का?
साध्या मराठी मुलाची
सोबतीण होशील का?

तुझ्या नाकावर नथ
कानी मोत्यांच्या कुड्या
गळ्यामध्ये ठुशी येता
होणे अप्सराही वेड्या

तुझ्या नाजुक गळ्यात
चपलाकंठी शोभेल
तुझी होऊनिया धन्य
मोहनमाळ ठरेल

वाकी पाटल्या मेखला
पायी पैंजणे जोडवी
किती मोहक हवीशी
माझी कल्पना असावी

साजेसा केसात खोपा
भाळी कुंकवाचा टिळा
ईतकेच मागतो हा
तुझा साजण वेंधळा

मराठी त्या दागिण्यांची
शोभा वाढवशिल का
एका मराठी मुलाची
सोबतीण होशील का?

तुषार जोशी, नागपूर
.

आविर्भाव

2011-07-28T19:47:00.000+05:30

(छायाचित्र सौजन्य: मंदार चितळे)

तुझ्यावर रागवणे
ठरवूनही जमेना
तुझे चैतन्य असे की
तुझ्याविना करमेना

तुझा मोलाचा दागिना
तुझा मोकळा स्वभाव
अरे मित्रा म्हणताना
स्नेहमयी आविर्भाव

तुझ्यावरती ठेवावा
डोळे मिटून विश्वास
तुझ्या शब्दांमध्ये आहे
मंद आश्वस्त सुवास

तुझी साथ लाभताना
कशाचिच नाही भीती
तुला धाडले मानावे
विधात्याचे ऋण किती

तुषार जोशी, नागपूर

उपकार

2011-07-28T16:43:00.000+05:30

(छायाचित्र सौजन्य: रचना कुलकर्णी)

त्या रचनाकाराने केवढे ते उपकार केले
तुला सावळा रंग आणि मला डोळे दिले
तुझ्या गालावर खळी मला खळीचे वेड
तुला मिश्किल शैली मला हृदय भोळे दिले

तुला घनदाट केस तुला गहिरे डोळे
मला भावनेत गच्च ओली दिली कविता
तुला आठवताच शब्द सुरेख अर्थ पांघरती
आजकाल मी कविता करतो येता जाता

तुला मिळाली जीवघेणी हसण्याची कला
गोड पापण्यांची भाषा आणि हळुच लाजणे
मला मिळाले ओढ, हुरहुर आणि वेडेपणा
तुझा विचार करत रात्र रात्र जागणे

तुषार जोशी, नागपूर

नशा पानपानात

2011-07-28T10:05:00.000+05:30

(छायाचित्र सौजन्य: शर्वरी राणे)

.तुला पाहताना असे वाटलेकी
जसा चंद्र आलाय बागेत माझ्या
तुझे चांदणे पांघरूनी बसावे
नसावे घड्याळास काटेच माझ्या

तुझ्या शूभ्र दातांचि जादू म्हणू की
तुझ्या दाट केसांचि किमया असावी
तुझे हासणे भान हरते असेकी
बघे ज्यास त्यालाच कविता सुचावी

तुला सांगतो मी जरा ऐक पोरी
तुझ्या हासण्यानेच फुलतात गाणी
तुझा स्पर्श होताच मोहरति पाने
निराशा हसे वेदना ही दिवाणी

तुझे श्वास मिळता फुले बाग अवघी
नशा पानपानात हिरव्या सुखाची
तुला फक्त स्मरतो जगाला विसरतो
नसे खंत ना आज पर्वा कुणाची

तुषार जोशी, नागपूर
.

लाघवी

2011-07-27T21:21:00.001+05:30

(छायाचित्र सौजन्य: शर्वरी राणे)

तुझा सावळा चेहरा लाघवी
तुझ्या हासण्याची तऱ्हा लाघवी

तुझ्या धुंद केसात गुंतून वाटे
मला आज वारा जरा लाघवी

उन्हाळे जिरावे तुझ्या पावसाने
तुझ्या बोलण्याचा झरा लाघवी

पुरा ठार झालो तरी भान ना
तुझ्या पाहण्याचा सुरा लाघवी

न होवो कधीही तुझे दूर जाणे
तुझा भासही बोचरा लाघवी

तुषार जोशी, नागपूर

येता जाता

2011-06-16T08:35:00.000+05:30

(छायाचित्र सौजन्य: श्वेता पेंडसे)

येता जाता
कितीतरी फोटो डोळ्यासमोर येतात.
टिकतात काही क्षण,
मग पुसटून जातात.
अश्याच अनेक फोटोंच्या नंतर
अचानक एकदा..
तुझा फोटो आला...
त्याच्या प्रभावाने
माझेच अस्तित्वच पुसटायला लागले.
तू फोटोतूनही
अस्तित्व व्यापून टाकलेस माझे
आता आणिक कोणताच फोटो पाहायची
इच्छा राहिली नाही
कदाचित काळालाही
पुढे सरकायची इच्छा राहिली नव्हती
तुझ्या फोटोकडे पाहण्याचा
माझा उत्सव थांबून तो पण पाहत असावा
तुझ्या बोलक्या डोळ्यांनी
तुझ्या मनमोकळ्या हसण्याने
जे दिले होते ते तर मी स्वप्नातही
कधी मागितले नव्हते
मी इतका खुळा तर कधीच नव्हतो
की एका फोटोवर खिळून जाईन
पण मला कळले
तुमच्या आयुष्यात एक फोटो
असा येतो की मग
सगळे आयुष्य त्याच्या भोवती
खिळून जाते.
तुम्ही स्वप्नातही न मागितलेले
अपार धन तुम्हाला मिळून जाते.
तुझा फोटो पाहिला..
मग मी उरलोच नाही.
तुझ्या अस्तित्वाचा सुंगंध
येऊ लागला पानापानातून
मला जगण्याचं
सुंदर कारण मिळालं तुझ्या फोटोमधून

तुषार जोशी, नागपूर

जगावेगळी किमया

2011-06-15T08:21:00.000+05:30

(छायाचित्र सौजन्य: श्वेता पेंडसे)

तुझ्या हसण्याचा शुभ्र गोड प्रकाश पडला
वारा वाहताना क्षण तुला बघाया अडला
तुझी खट्याळ टिकली काळजात उतरली
तुझ्या स्वप्नाळू डोळ्यांची भूल पडली मनाला

किती निरागस हसू वागवते तू लिलया
तुझ्या कुरळकेसांची जगावेगळी किमया
तुझ्या सावळ्या रंगात एक अनामिक ओढ
बाणासमान रूतती तुझ्या नाजुक भिवया

कसे सांग ना आताशा सांभाळावे हृदयास
पसरला असण्याचा तुझा मोहक सुवास
तुझा प्रभाव ईतका खोल जाणवतो आता
तुला आठवत होतो दिन रातीचा प्रवास

तुषार जोशी, नागपूर

रेष माझी कुंकवाची

2011-06-15T00:48:00.000+05:30

(छायाचित्र सौजन्य: श्वेता पेंडसे)

तुझ्या केसात सजली
रेष माझी कुंकवाची
तुझ्या डोळ्यात जगली
स्वप्ने माझी आयुष्याची

तुझे हसणे साजणी
तुझे खट्याळ बघणे
तुझे दुरून ईषारे
माझे दुरून जळणे
ऐक अशी बरी नाही
थट्टा माझी पामराची
तुझ्या डोळ्यात जगली
स्वप्ने माझी आयुष्याची

तुझ्या सावळ्या रंगाचा
दंश झाला पानोपानी
त्यात कहर मांडला
तुझ्या कुरळ्या केसांनी
मेघ तुझे रूपघन
हौस माझी पावसाची
तुझ्या डोळ्यात जगली
स्वप्ने माझी आयुष्याची

तुषार जोशी, नागपूर
.

तुझा सावळा शृंगार

2011-06-15T00:17:00.000+05:30

(छायाचित्र सौजन्य: श्वेता पेंडसे)

.

तुझा सावळा शृंगार
जीव जाहला अंगार
किती रुतते रुतते
तुझ्या नजरेची धार

असे पाहू नको वेडे
जीव वितळतो माझा
तुझी ओढ काळजात
घेऊ लागली आकार

आता पाठीमागे सारे
बोल बोलतील मला
काय जाहले हो याला?
अहो गुणी होता फार

कसे सोसतो सोसतो
तुझ्या असण्याचे तेज
तुटे इतकी नादते
मन कोवळी सतार

घनघोर बरसतो
आता सुखाचा पाऊस
तुझा आठव मल्हार
तुझा विचार मल्हार

तुषार जोशी, नागपूर

गुलकंद

2011-05-27T21:18:00.000+05:30

(छायाचित्र सौजन्य: त्रिशाला)

..

तुझा विचार सुगंध
तुझा चेहरा आनंद
तुला पाहणे गुलाब
तुझे स्मीत गुलकंद

तुझे असणे रोमांच
नसता ये आठवण
माझ्या दाट काळोखात
तुझ्या रुपाचं चांदणं
तुझे नाव मोरपीस
आठवता शब्द धुंद 

तुला पाहणे गुलाब
तुझे स्मीत गुलकंद

तुझा प्रभाव लपेना
जादू पानापानावर 

तुझ्या सहजपणाचे
तेज माझ्या मनावर 

तुला पाहत राहणे
उरे एकलाच छंद
तुला पाहणे गुलाब
तुझे स्मीत गुलकंद

तुषार जोशी, नागपूर 

२७ मे २०११, २०:००

टेडी

2011-05-19T20:37:00.000+05:30

(छायाचित्र सौजन्य: साँची)

तुला सगळंच ठाऊक आहे रे
माझं ते हसणं माझं रूसणं
कधी तुझ्याजवळ रडत वसणं
धावत येउन बिलगण्याची जागा
माझ्या सुख दुःखातला धागा
तू आहेस

माझ्याकडे पाहून हसतोस ना
क्षणभर हलकं हलकं वाटतं
तुला घेउन नाचावसं वाटतं
गोलू मोलू मखमली मस्त
माझ्या लहानपणाचा हट्ट
तू आहेस

माझे छकुले बाळ होतोस
अन माझ्यात ममतेचा झरा
तू खेळवत ठेवतोस खरा
प्रीतीचा साधक निव्वळ
माझ्यातले प्रीतीचे बळ
तू आहेस

तुषार जोशी, नागपूर

रसिकांचा प्रेषित

2011-05-14T22:03:00.001+05:30

(छायाचित्र सौजन्य: ज्ञानेश वाकुडकर)

जे लिहितो तू रक्ताने
संदर्भ तुझ्या वचनांचे
विश्वाला व्यापुन उरते
ते मोल तुझ्या शब्दांचे

कधी भावुक कधी मनमौजी
कधी वेडा घोषित होतो
कधी लिहितो असले काही
रसिकांचा प्रेषित होतो

प्रेमाचा कवि होताना
गुण गातो आर्त सखीचे
दुःखाचा सागर होतो
मन जाणतोस नदीचे

शब्दा शब्दातून देतो
तू रसिकांना आनंद
हृदयांना काबिज करणे
जाणतो तुझा मी छंद

तुषार जोशी, नागपूर
१४ मे २०११, २१:००

कित्ती कौतुक

2011-05-14T18:37:00.000+05:30

(छायाचित्र सौजन्य: पूजा)

कित्ती कौतुक
कित्ती कोतुक तुझ्या डोळ्यात
भरून वाहते गं
हळवं भावुक
कित्ती कौतुक

माझी भरारी
पाहुन तुला मिळालेलं सुख
कणाकणातुन ओसंडताना दिसते ना
धन्य होतो मी
डोळा पाणवे आपसुक
कित्ती कौतुक

किती साधा ना
सर्वांसारखाच एक
तू ईतकं महत्व देऊन मला
सशक्त करतेस
मोठ्ठं करतेस खूप
कित्ती कौतुक

हेच कौतुक
टिकवण्यासाठी
कदाचित काहीही करून जाईन
कळेलच तुला
मग पाहिन गुपचुप
कित्ती कौतुक

तुषार जोशी, नागपूर
१४ मे २०११, १८:३०

सावळी आहे

2011-05-12T07:42:00.000+05:30

(छायाचित्र सौजन्य: प्रतिज्ञा)

मंद हसते, गोड दिसते, सावळी आहे
स्वप्न बघते, सत्य जगते, ती खुळी आहे

कंच हिरवा, रंग खुलतो, शोभतो अंगा
संथ निर्मळ, सौंदर्याची, ही जणू गंगा
त्यात किमया, काय गालावर खळी आहे
मंद हसते, गोड दिसते, सावळी आहे

चंद्र टिकली, मुग्ध करते, साधिशी छोटी
पाहतो जो, मात्र अडतो, डोळिया काठी
लाजली पाहून तिजला हर कळी आहे
मंद हसते, गोड दिसते, सावळी आहे

तुषार जोशी, नागपूर
हैद्राबाद नागपूर प्रवास, २१:४०

ईतकं मनमोकळं हसलीस

2011-05-07T20:07:00.001+05:30

(छायाचित्र सौजन्य: शुभांगी दळवी)

ईतकं मनमोकळ हसलीस
क्षणभर श्वास घेणंच विसरलो
रम्य निसर्ग होता सभोवती
मी तिकडे बघणंच विसरलो

तुझ्याबरोबर जगलो मी ते
दोन क्षण अमूल्य होते
ईतकं निखळ सौंदर्य बघणारा
मी एक पुण्यवंत ठरलो

अजून आठवता तुझा चेहरा
प्रकाशतात माझे गाभारे
त्या अनंदाचे ढग झेलतात
जरी दुःखाने मी कोसळलो

ईतकं मनमोकळ हसलीस
क्षणभर भानावर येणंच विसरलो
तुला पाहणेच झाला सोहळा
धन्य झालो मी मोहरलो

तुषार जोशी, नागपूर
०७ मे २०११, २०:००

हसतेस तू

2011-04-28T22:29:00.000+05:30

(छायाचित्र सौजन्य: त्रिशाला परूळकर)

हसतेस तू
बहरे ऋतू
नुसते बघावे वाटते

बघता तुला
नकळे मला
तू अप्सरा का भासते

जपतो खुणा
वळुनी पुन्हा
तू हासलिस जेव्हा जिथे

स्मरता तुला
कळते मला
मन लागले आता कुठे

हसतेस तू
बहरे ऋतू
नुसते बघावे वाटते

तुषार जोशी, नागपूर

तुझे नाव मनात येताच

2011-04-28T21:46:00.001+05:30

(छायाचित्र सौजन्य: त्रिशाला परूळकर)

तुझे नाव मनात येताच
गालावर माझ्या येते लाली
लोकं मनात म्हणत असतील
बघा किती नटून आली

तुझे हसणे कधी आठवताच
ओठांवर फुटते सहजच मित
लोक म्हणत असतील दिसते
आजकाल ही भलतीच खुशीत

आरशात पाहता माझंच रूप
सांगतं दिसतेस भलतीच स्वीट
म्हणतं माझीच नजर लागेल
कानामागे लाव काळी टीट

तुषार जोशी, नागपूर

साक्षी

2011-04-17T10:47:00.000+05:30

(छायाचित्र: सीमा जोशी)

तुझ्यातला साधेपणा

तू कधी हरवू नकोस

तू आहेस तशीच रहा

माझ्यासाठी बदलू नकोस

तुझ्या रहस्यमय वाटांचा

मी होईन एक प्रवासी

तुझ्या माझ्या दाट प्रेमाचा

दिवा असेल माझ्या पाशी

तुझी अनंत स्वरूपे

चंद्र चांदण्यांची नक्षी

तुझ्या प्रत्येक रूपाचा

मी होईन निव्वळ साक्षी

तुषार जोशी, नागपूर

तुझे असणे हेच माझे धन

2011-04-16T13:15:00.000+05:30

(छायाचित्र सौजन्य: मनाली साटम)

तुझ्यावर लिहिली मी गझल
तुझ्यावर लिहिला मुक्तछंद
तुझ्यावर लिहिली जरी कविता
शब्दात मावेना ईतका आनंद

तुझ्यावर महाकाव्य लिहिले जरी
काहीतरी राहूनच जाईल
माझ्या शब्दांचे सगळे थेंब
तुझा सागर गमतीने पाहिल

तुला लिहिण्याचा सोडलाय नाद
फक्त भिजतो तुझ्या रूपात
तुझी आठवण येताच होते
रिमझिम पावसाची सुरवात

भिजतो रूजतो अंकुरतो मी
तुझे असणे हेच माझे धन
तुला पाहून तुला आठवून
सुगंधती दिवसाचे सारे क्षण

तुषार जोशी, नागपूर

मला हसविते ती

2011-04-16T00:25:00.000+05:30

(छायाचित्र सौजन्य: मनाली साटम)

मला हसविते ती मला रडविते ती
जगावे कसे ते मला शिकविते ती

तिचे आणि माझे असे खोल नाते
तिला पाहता सूख दाटून येते
निराशा कधी ठाव घेता मनाची
नवे गीत गाऊ मला सुचविते ती

पळे दूर चिंता तिला भेटण्याने
मना ये उभारी तिला सांगण्याने
जगाचे उन्हाळे कधी तीव्र होता
तिच्या पावसाने मला भिजविते ती

तिला दुःख येवो न चिंता कधीही
तुला देवबापा मनी प्रार्थना ही
तिची साथ मिळता खरे स्वप्न होते
कहाणी निराळी अशी घडविते ती

तुषार जोशी, नागपूर

स्वच्छंदी

2011-04-12T22:42:00.000+05:30

(छायाचित्र सौजन्य: मनाली साटम)

.

ती मनात राहते माझ्या
आरशात बघताच गोड हसते
कौतुकाने डोळेभरून बघते
पुन्हा हसते...
लाजवते मला अगदी.
कधी कधी कानात जाऊन बसते,
म्हणते असं कर; असं करू नकोस
फार कुठे अपेक्षा ठेऊ नकोस
मनास रूचेल तसेच करत जा
जेव्हा जेव्हा गावेसे वाटेल, बिनधास्त गा
नवल वाटतं मला तिचं
किती स्वच्छंदी आहे ती
आणि सगळ्यांचे मन सांभाळण्यात
मुळात अडकून पडलेय मी

तुषार जोशी, नागपूर

पाहिले होते तुला मी

2011-04-12T01:22:00.000+05:30

(छायाचित्र सौजन्य: मनाली साटम)

सावळ्या रंगास आली काय गोडी रंगताना
मी म्हणालो 'हाय जालिम मार डाला' पाहतांना

खोल झाला वार होता शल्य त्याचे काय सांगू
पाहिले होते तुला मी लाजुनिया हासताना

काय झाले काळजाचा एक ठोका सापडेना
घेतले तू नाव माझे काल जेव्हा बोलताना

मोहिनी केसांमधे काही तुझा गं दोष नाही
गुंततो जो तो सुगंधी केस ते तू माळताना

तू दिसावे तू हसावे तू असावे अतरंगी
मी बघावा रोज माझा जीव वेडा भाळताना

तुषार जोशी, नागपूर
१२ एप्रिल २०११

गेय कविता

2011-02-02T09:22:00.000+05:30

(छायाचित्र सौजन्य: शिल्पा, छायाचित्रकार: तुषार)

ती सावळी मुलगी माझे
काळिज घेऊन गेलेली
जगतो आहे तालामध्ये
जगण्याला लय आलेली ।। ध्रु ।।

ती म्हणाली ज्या क्षणी
की सवय झाली तुझी
चोहीकडे संगीत वाजू लागले
माझ्या सगळ्या चिंता
माझी सगळी शल्ये
सगळी पळून गेलेली ।। १ ।।

भाव जागू लागले
शब्द नाचू लागले
कवितेत माझ्या अर्थ दाटू लागले
साधासा धडा होतो
आता माझ्या जगण्याची
गेय कविता झालेली ।। २ ।।

टेकते छातीवरी
चेहरा विश्वासुनी
वाटे मी राजा विश्व माझे जाहले
जगही जिंकेन मी
काहीही करेन मी
शक्ती अशी मिळालेली ।। ३ ।।

(सावळ्या मुलीची गाणी / तुषार जोशी, नागपूर)

सावळी तू

2010-11-01T21:28:00.000+05:30

(छायाचित्र सौजन्य: अनुजा)

.

तूच आशा
तू दिलासा
तू निराळी
वेगळी तू
सावळी तू

भावनांचा
मोक्षबिंदू
वीज जैशी
वादळी तू
सावळी तू

स्मीत माझे
गीत माझे
या मनाच्या
राऊळी तू
सावळी तू

भास नाही
तूच ती तू
पाहतो त्या
त्या स्थळी तू
सावळी तू

शब्द माझे
भाव माझे
झेलणारी
वेंधळी तू
सावळी तू

ज्योत माझी
तेवतांना
काळजीची
ओंजळी तू
सावळी तू

(सावळ्या मुलीची गाणी / तुषार जोशी, नागपूर)

सांगू कसे तुला मी

2010-10-26T11:55:00.000+05:30

(छायाचित्र सौजन्य: प्रतिज्ञा)

ए सावळ्या मुली गं
सांगू कसे तुला मी
माझाच मी न उरलो
झालो पुरा तुझा मी ।। ध्रु ।।

स्वप्नात मी तुझ्याशी
गोष्टी कितीक करतो
येता तुझ्या समोरी
पुन्हा मुकाच ठरतो
ही ओढ जीवघेणी
झुरतो तुझ्या विना मी ।। १ ।।

जादू तुझ्या छटांची
घायाळ रोज करते
मी टाळतो तरीही
मन आठवांत फिरते
आता तुझ्याच साठी
वेडापिसा खुळा मी ।। २ ।।

स्वप्नात पाहिलेले
सत्यातही घडावे
जगणे तुझे नि माझे
बघ एकरूप व्हावे
जगणे तुझ्या विना गं
जगणे न मानतो मी ।। ३ ।।

(सावळ्या मुलीची गाणी / तुषार जोशी, नागपूर)

अनवट माया

2010-10-21T11:20:00.000+05:30

(छायाचित्र सौजन्य: पल्लवी)

.

काळ्या सावळ्या मुलीची
आहे अनवट माया
काळ्या रेशमी केसांची
कशी घनदाट छाया ।। ध्रु ।।

शुभ्र मोगऱ्याच्या मुळे
केसामध्ये फुले,
सुगंधी उत्सव
कानामध्ये मोती डुले
किती मोहमयी,
असावे वास्तव
तिला भेटण्या आधीचा
सारा जन्म गेला वाया ।। १ ।।

स्मित हळुवार धुंद
कसा चहुकडे,
प्रकाश पसरे
चंद्रबिंदी बघताना
बघणारा भान,
सगळे विसरे
फक्त आठवाने तिच्या
माझी रोमांचित काया ।। २ ।।

(सावळ्या मुलीची गाणी / तुषार जोशी, नागपूर )

ते तुझे डोळे टपोरे

2010-08-24T15:35:00.002+05:30

(छायाचित्र सौजन्य अश्विनी, छायाचित्र - अश्विनी)

ते तुझे डोळे टपोरे स्वप्न त्यांतून सांडते
भावनांचे गाव तू शब्दात हळवे मांडते
.
सावळ्या रंगास आला गोडवा तुझिया मुळे
अश्विनी हे नाव त्या रंगास द्यावे वाटते
.
चेहऱ्यावर या तुझ्या कविता कशी करतात गं
रुप गहिरे आमच्या थेंबात कसले मावते
.
केस रेशम गाल मखमल स्मित कातिल ओठीचे
पाहिले कितीदा तरी पुन्हा पहावे वाटते
.
सादगी पाहून माझा जीव बघ नादावला
होई दृष्टी सोहळा साधी जरी तू वागते
.

.
तुषार जोशी, नागपूर
२४ ऑगस्ट २०१०, ११:००
.

मला आवडे उत्कटता

2010-07-13T10:14:00.000+05:30

(छायाचित्र सौजन्य: स्तुती)

बरीच प्रसाधने घेता येतील
पण मला आवडे उत्कटता
चेहरा खुलून येतो सहज
जेव्हा प्रकटते उत्कटता
.
काजळ लाली पावडर सारे
शिनगार करतील की उसना
प्रितीयुक्त भावनांनी चेहरा
अनुपम फुलून येईल ना
.
नथ डूल माळ दागिने
नटवणार की हो रूपाला
पण तरीही तोडच नाही
मादक मोहक हसण्याला
.
तुषार जोशी, नागपूर
१२ जुलै २०१०, १०:४५

एकटक बघायला लागला

2010-07-09T22:05:00.001+05:30

(छायाचित्र सौजन्य मेघनाद)

.

.

एकटक बघायला लागला
आज तो हसता हसता
माझा एक ठोका चुकला
त्याला बघता बघता
.
आज मला तो अचानक
वाटला नवा नवा
त्याच्या नजरेत नेम होता
बोचरा पण हवा हवा
.
आज आरशात स्वतःचे
वेगळेच रूप पाहिले
गाल हलके गुलाबी
डोळे लाज लाजलेले
.
एका नजरेत आज तो
हुरहुर लावून गेला
माझे काळीज स्वतःच्या
सोबत घेऊन गेला
.

.
तुषार जोशी, नागपूर
०९ जुलै २०१०, १०:००

आणि जेव्हा ती हसली

2010-07-07T23:56:00.002+05:30

(छायाचित्र सौजन्य: प्रणोती)

मनातले सांगितले तेव्हा

उगाच रूसुन असलेली

जीव टांगणीला लावून ती

रागात जाऊन बसलेली

भांड्यात पडला जीव

हळून पुन्हा ती दिसली

मागे वळून पाहिले

आणि जेव्हा ती हसली

सुगंधले जगणे माझे

टवटवले फुलले

कसे होईल काय होईल

सगळे प्रश्न नुरले

माझी तिची एक स्थिती

माझी खात्री पटली

मागे वळून पाहिले

आणि जेव्हा ती हसली

तिच्यासाठी किती किती

मला करायचे होते

तिचे हसणे जपण्यासाठी

घर विणायचे होते

माझ्या जगात आली ती

माझी चिंता मिटली

मागे वळून पाहिले

आणि जेव्हा ती हसली

जीव जडतो तेव्हा

खुळ्यासारखे होते

तिलाही तसेच व्हावे

अशीच ईच्छा होते

माझीच छबी मला

डोळ्यात तिच्या दिसली

मागे वळून पाहिले

आणि जेव्हा ती हसली

स्थळ काळ सगळे

माझ्या साठी विरले

तिचा होकार आणि एक

धडधडते काळीज उरले

भावनांचे शब्द झाले

अचानक कविता सुचली

मागे वळून पाहिले

आणि जेव्हा ती हसली

तुषार जोशी, नागपूर

०७ जुलै २०१०, २३:४५

सुंदर कविता

2010-01-25T20:52:00.001+05:30

(छायाचित्रकार: मीच, सौजन्य: श्वेता)

कुण्या खुळ्या कवीची

आहेस तू सुंदर कविता

ईतके नीट नेटके रूप

कुणी कसे बनवू शकतं?

तो नक्कीच शुद्धीत नसेल

तुला बनवून त्याने स्वतःलाच

टाळी दिली असेल

निरागस कळी उमलावी

हळूच जशी पहाट होता

कुण्या खुळ्या कवीची

आहेस तू सुंदर कविता

ईतकं सहज हृदयाला

भेदून जाणारं

कुणी कसं हसू शकतं?

तुझ्यात त्याचे अंतरंग

भरभरून झालेय व्यक्त.

तुला बघून त्या कवीसाठी

नतमस्तक होई माथा

कुण्या खुळ्या कवीची

आहेस तू सुंदर कविता

तुषार जोशी, नागपूर

२५ जानेवारी २०१०

तुझे डोळे

2010-01-22T10:17:00.002+05:30

(छायाचित्र सौजन्य मोहिनी)

तुझे डोळे

वेडावुन जाती तुझे डोळे

तुझे डोळे

मन जड झाले

भांबावुन गेले

विरहात माझे

रंग हरवले

सप्तरंगी तेव्हा

स्मरणांच्या भेटी

रंगवुनी देती तुझे डोळे

सुगंधात न्हाते

मोहरून येते

पाहताना माझे

भान हरपते

पापणीच्या आड

प्रेम साठवती

सखे माझ्या साठी तुझे डोळे

स्वप्न जगण्याचे

उंच उडण्याचे

तुझ्यामुळे सारे

क्षण स्वर्ग माझे

आशेची किनार

समृद्धिची ओटी

चैतन्याच्या ज्योती तुझे डोळे

तुषार जोशी, नागपूर

संधी

2009-06-17T18:54:00.004+05:30

(छायाचित्र सौजन्य मंदार)
.
तो तत्वज्ञान बोलतो
कवितेतून त्याच्या
पण मला दीपवून जातो
प्रकाश चेहऱ्याचा

शब्द बघ शब्द बघ
आग्रह त्याचा नेहमी
पण डोळ्यांच्या रोख कसा
सोडवायचा आम्ही

कविता ऐकायला माझी
ना नसतेच कधी
डोळे भरून चेहऱ्याकडे
बघण्याची तिच संधी

कवितेतून मनावर
चालतंच त्याच राज्य
गोड हसून काबीज ठेवतो तो
हृदयाचेही साम्राज्य

तुषार जोशी, नागपूर
१७ जून २००९, १८:००

.

हारवलेलं हसू

2009-05-12T07:48:00.003+05:30

(छायाचित्र सौजन्य अनुश्री)

कुणाचं हसू हारवलेलं दिसलं

की आपल हसणं थोड पेरावं

दिल्याने वाढतोय हा खजिना

देता देता श्रीमंत व्हावं

तुमच्यासाठी सोप्पं असेल

सहज गोड हसायचं इतकच

कुणाला जगणं शिकायला

हवं असेल कदाचित तितकच

हसल्याने आयुष्य वाढतयं

हसावं आणि सुंदर दिसावं

दिल्याने वाढतोय हा खजिना

देता देता श्रीमंत व्हावं

तुषार जोशी, नागपूर

११ मे २००९, २२:००

आनंदाचे कण

2009-03-25T09:28:00.001+05:30

(छायाचित्र सौजन्य आसावरी)

हास्याने सांडले तुझ्या

आनंदाचे कण

लख्ख लख्ख उजळले

सगळेच क्षण

घरभर पसरले

डोळ्यातले तेज

हर्ष मावेनाच झाले

आभाळ लहान

एका क्षणी झाला सर्व

ऋतूंचा सोहळा

तू सूर्याची उब तूच

चंद्राचं चांदणं

मोहरल्या बावरल्या

शब्दांच्या पाकळ्या

निखळ हसणे झाले

पहाट किरण

कण कण मी वेचतो

मनाच्या कुपीत

आठवावे जातायेता

नेहमी म्हणून

तुषार जोशी, नागपूर

हासली तू

2009-03-16T19:27:00.002+05:30

(छायाचित्र सौजन्य मिताली)

हासली तू

हासली तू की मनाला

चांदण्यांचा स्पर्ष झाला.

की फुलांना उमलतांना?

गंधवेडा हर्ष झाला.

हासली तू मंद वारे

वाहतांना स्तब्ध झाले

आसमंती चंद्र तारे

लाजले भयमुग्ध झाले

हासली तू आणि माझा

पाहण्याचे गीत झाले

शब्द भारावून गेले

भाव सारे प्रीत झाले

तुषार जोशी, नागपूर

कुठे पाहते ग पोरी

2009-03-15T11:35:00.001+05:30

(छायाचित्र सौजन्य शिवानी)

कुठे पाहते ग पोरी

डोळे तिरके करून

मनातले कळेचना

तुझा चेहरा बघून

गालावर पसरले

किती हसणे रेखीव

आज बिचा~या कुणाचा

कुठे जाणार का जीव

डोळ्यांमध्ये साठलेले

आहे कौतुक कुणाचे?

आहे रहस्य कसले

तुझी कली खुलण्याचे?

नको सांगू नको सांगू

ठेव गोष्ट लपलेली

तुझे डोळे कधी तरी

करतीलच चुगली

तुषार जोशी, नागपूर

प्रतिबिंब

2008-12-12T10:24:00.001+05:30

(छायाचित्र सौजन्य योषिता)

तू कविता ऐकतेस ना

तेव्हा तूच कविता होतेस

डोळे बंद करतेस ना

तेव्हा तर जीवच घेतेस

मी थोर कवीची कविता

बघताना हरवून जातो

माझी कविता मेणबत्ती

तू सूर्य होऊन जातेस

तुलाच लिहितो नंतर

मी शब्दा शब्दां मध्ये

शब्दांच्या तळ्यात मग तू

प्रतिबिंब होऊनी खुलतेस

तुषार जोशी, नागपूर

एक मुलगी

2008-10-23T20:16:00.001+05:30

(छायाचित्र सौजन्य सुप्रिया)

आलेल्या दुःखाला

हसुन साजरे करते

एक मुलगी जगण्याचे

सुमधुर गाणे करते

वास्तव जगताना हो

स्वप्ने पण बघते ती

क्षण हरवले त्यांना

अधुन मधुन स्मरते ती

ही मुलगी आसपास

आहे तुमच्या बरका

जाणवेल अचानक

कधी आनंदाचा झोका

तीव्र तिच्या दुःखाने

रात्र ही होते आहे

हळुच तिच्या स्वप्नांची

पहाट जन्मते आहे

सापडली जर ही कधी

तिला सांगणार आहे

तुझ्या मुळे दुःखातही

सुख नांदणार आहे

तू अशीच प्राणपणे

दुःखाला जगत रहा

हसणे पसरून जगणे

मंगलमय करत रहा

तुषार जोशी, नागपूर

मी चालत राहीन

2008-06-17T12:10:00.003+05:30

(छायाचित्र, गौरी यांच्या सौजन्याने)

मी चालत राहीन मी चालत राहीन
मी चालत राहीन मी चालत राहीन

माझा माझ्यावरती विश्वास माझा प्रवास होईल खास
येईल दुःख येईल सुख निर्भय स्वीकारीत जाईन
मी चालत राहीन मी चालत राहीन
मी चालत राहीन मी चालत राहीन

मी जेव्हा जेव्हा मंगल कामासाठी माझे हात दिले
तेव्हा तेव्हा सगळीकडून मदतीला मित्र धावत आले
मी मित्रवान मी भाग्यवान मी स्वाभिमानी मी शक्तिवान
सगळ्या कामा मध्ये माझा मी एक ठसा ठेवीन जाईन
मी चालत राहीन मी चालत राहीन
मी चालत राहीन मी चालत राहीन

स्वप्ने असतील माझी मोठी शिखरांना जाऊन भीडणारी
ठरवीन ध्येय गाठेन ध्येय प्रसन्नता पसरविणारी
वीवेकवान मी धैर्यवान मी जागरूक मी प्राणवान
जाईन तिथे मी शक्ती कण उधळीत जाईन पसरीत जाईन
मी चालत राहिन मी चालत राहीन
मी चालत राहीन मी चालत राहीन

तुषार जोशी, नागपूर

खारूताई

2008-06-13T21:17:00.002+05:30

(छायाचित्र के श्रीश यांच्या सौजन्याने)

छोटीशी खारूताई
दगडावर बसली होती
निरागस गोजिरवाण्या
दिसण्याने नटली होती
.
इवल्याश्या अस्तित्वाने
हृदयाचा पीळ गळाला
आडून तिला बघण्याचा
माझा गं उत्सव झाला
.
तुषार जोशी, नागपूर

संवेदनेच्या बायनाकुलर ने

2008-05-30T09:03:00.002+05:30

(छायाचित्र गौरव यांच्या सौजन्याने)

.
.
संवेदनेच्या बायनाकुलर ने
दूरचे बघायचा प्रयत्न करतेय
दहा पंधरा वर्षांनंतर
बघूया मी कशी दिसतेय
.
वा नवे मित्र आहेत
जुने पण टीकून आहेत
तीव्र इच्छा अंतरमनात
तीव्रतेने पोहचवतेय
दहा पंधरा वर्षांनंतर
बघूया मी कशी दिसतेय
.
पैशापुढे शिक्षणाला
मी नेहमीच महान मानलंय
फार श्रिमंती दिसत नाही
नावापुढे डॉक्टर लागलेय
दहा पंधरा वर्षांनंतर
बघूया मी कशी दिसतेय
.
दोन पिलं आहेत जवळ
ममतेची डोळ्यात तृप्ती
माझ्या स्वप्नांचे आयुष्यावर
प्रक्षेपण करून बघतेय
दहा पंधरा वर्षांनंतर
बघूया मी कशी दिसतेय
.
.
तुषार जोशी, नागपूर
.
.

आनंद वाटतो तुझा हासरा चेहरा

2008-05-28T15:39:00.001+05:30

(छायाचित्र सहयोग: अवंती)

आनंद वाटतो तुझा हासरा चेहरा
मनात राहतो तुझा हासरा चेहरा

कुणीतरी आहे हृदयात लपलेले
गुपित सांगतो तुझा हासरा चेहरा

दुःख विसरावे ओठात हसू यावे
इतके मागतो तुझा हासरा चेहरा

डोळे बंद केले तरी समोरच येतो
खट्याळ वागतो तुझा हासरा चेहरा

एकांताची बाधा मनास कधी झाली
प्रकाश पेरतो तुझा हासरा चेहरा

तुषार जोशी, नागपूर

तुझं ते बघणं...

2008-05-26T23:49:00.002+05:30

(छायाचित्र सहयोग: दीपा)

हातावर हनुवटी ठेवून
तुझं ते बघणं.. मी आठवतो
दूर असताना.
त्या आठवणीत भिजतो
रूजतो...
मोहरतो...
आणि...
नव्या उमेदीने.. पुन्हा
शब्दात उतरतो...
तुझ्यासाठी.

धावत येतो
तुला ऐकवण्यासाठी
बळेच समोर बसवून
हमखास हक्क गाजवतो
आधी ऐक म्हणून
कविता आवेशात
सादर करून दाखवतो

तुला सगळं कळतं
तुझ्या डोळ्यात दिसतं
जसं काही तुला म्हणायचंय
तुला कसं रे हे सुचतं
तू हमखास दाद देतेस
कधी खरच..
कधी मन राखण्या साठी.

काहिही असो..
मला मिळतं बक्षिस
एका कौतुकाने भरलेल्या..
टपोऱ्या डोळ्यांच्या ..
मुलीचे चित्र.
डोळ्यात साठवण्यासाठी.

तुषार जोशी, नागपूर

केसांची नागिण

2008-05-05T23:38:00.002+05:30

(छायाचित्र, सामिया च्या सौजन्याने)

सांभाळावं किती जीव गेला नादावून
डसली गं हाय तुझ्या केसांची नागिण

काळ्याभोर केसांचे गं अल्लड वळणे
दातात दाबणे ओठ सहज हासणे
कपाळाची बट जशी रूपाला तोरण
डसली गं हाय तुझ्या केसांची नागिण

विसरलो स्वेटर ते घ्यायला मी आलो
तुझ्या अंगावर तेच पाहता खिळलो
केव्हढा तो मोठा माझ्या स्वेटरचा मान
डसली गं हाय तुझ्या केसांची नागिण

मानेवर दिसे हनुवटीची सावली
बघतांना होतो जीव माझा वर खाली
मनी सदा वाजे तुझ्या रूपाची पैजण
डसली गं हाय तुझ्या केसांची नागिण

तुषार जोशी, नागपूर

खळखळून मग हसलो

2008-05-05T09:21:00.003+05:30

(छायाचित्र - सोनल चिटणीस यांच्या सौजन्याने)

खळखळून मग हसलो पुन्हा एकदा आपण
देह भान विसरलो पुन्हा एकदा आपण

मित्रांच्या येण्याला मी स्वर्ग मानले नेहमी
टाळी देऊन घेऊन आयुष्य वाढले नेहमी
मैत्रीच्या नात्याचे सार्थक हो पुन्हा झाले
मैत्रीचा उत्सव झालो पुन्हा एकदा आपण

खळखळून मग हसलो पुन्हा एकदा आपण
देह भान विसरलो पुन्हा एकदा आपण

निर्व्याज असे हसताना सातही मजल्यां वरती
आकाशाला भीडते अपुल्या असण्याची मस्ती
रटाळ आयुष्याची राख ही झटकुन अपुली
विस्तव होऊन आलो पुन्हा एकदा आपण

खळखळून मग हसलो पुन्हा एकदा आपण
देह भान विसरलो पुन्हा एकदा आपण

कोटीचा अचूक माझ्या अर्थ यांना कळतो
इतके जाणूनच मजला आनंद अमाप मिळतो
काढून जुनी ती घटना डोळ्यांना डोळे भीडले
बहोत खूब म्हणालो पुन्हा एकदा आपण

खळखळून मग हसलो पुन्हा एकदा आपण
देह भान विसरलो पुन्हा एकदा आपण

तुषार जोशी, नागपूर

जन्म दिला

2008-03-18T22:26:00.002+05:30

मी तुला, तू मला जन्म दिला
प्रेम वाटण्याचा मनोहर छंद दिला

तुषार जोशी, नागपूर

(Image courtesy Sean Dreilinger)

सीसीडी आणि कॉफी

2008-01-12T10:43:00.000+05:30

.

नेहमी असेच सीसीडी मधे
येऊन परतलो असतो
नेमके बोलायची वेळ आल्यावर
गप्पच बसलो असतो

कॉफीचा कपच आला तेव्हा
आपल्यासाठी धावून
क्रीम चा तू बदाम काढलास
माझ्याकडे पाहून

तुझ्याकडे पाहून तेव्हा
मी मनापासून हसले
हात हातात घेऊन
हो म्हणून बसले

सीसीडी आणि कॉफी
एक गोड आठवण
इथेच घट्ट झाली ना रे
आपल्या नात्याची वीण

तुषार जोशी, नागपूर

झुरळ पुराण

2008-01-11T21:42:00.001+05:30

Cocroach, originally uploaded by Vijayaraj.

.

एकदा एका झुरळाला
असह्य झाले झुरळपण
त्याने फुलपाखरू होण्याचा
मनामधे केला पण

विविध रंगांनी आपले
पंख त्याने रंगवले
फुलांवर दिमाखात
तेही मिरवू लागले

फुलपाखरामध्ये फिरला
पाहिल्या विविध छटा
पण थोड्याच वेळात
झाला एकटा एकटा

त्याला समजणारे
तिथे कोणीच नव्हते
फुलपाखरांचे सगले
संदर्भ वेगले होते

ओशाळला बिचारा
परत फिरला माघारी
मित्रांनी केली होती
स्वागताची तैयारी

बगिचा रिटर्न झुरळ
म्हणून मित्रांचे स्वागत
ग्रहण करत बिलगला
सगळ्यांना धावत धावत

मनापासून म्हनाला
मित्रांनो मी चुकलो
आपल्याच वेडात ख-या
झुरळपणाला मुकलो

आता एक चांगले
झुरळ व्हायचे ठरवलेय
स्वतःच्या अस्तित्वाला
आता मी ओळखलय

तुषार जोशी, नागपूर

आकाश

2008-01-09T13:10:00.001+05:30

.

तू आकाश दिलेस मला
मनमुक्त उडण्यासाठी
आणिक एक घर दिलेस
थकून कुशीत शिरण्यासाठी

आता थोडे थोडे सगळ्यांना
आकाश वाटत फिरतोय
ज्यांना घर नाही त्यांना
घर देण्याचे स्वप्न बघतोय

घरी वाट पाहतय कोणी
तू असा दिला विश्वास
मी फिरतोय खिन्न दिव्यात
भरत अता ज्योतींचे श्वास

तुषार जोशी, नागपूर

एकटा

2008-01-08T01:04:00.001+05:30

last days, originally uploaded by pabloest.

.

एकटा
कोणी नाही सोबतीस
आज हो
कोणी थांबलेना
आसपास हो
मग रडावे तरी
कशाला सांगा कशाला

भागलो
कुणा कुणा साठी
रोज भागलो
किती किती
रात्र रात्र जागलो
गरज संपली जणू
आज कोणी
विचारते ना मला
मग रडावे तरी
कशाला सांगा कशाला

संपले
लाड प्रेम सारे
सारे संपले
माझ्यासाठी
कोणी नाही जागले
काम झाले अता
जो तो आज
पाय काढू लागला
मग रडावे तरी
कशाला सांगा कशाला

तुषार जोशी, नागपूर

कळत नाहीये

2008-01-07T23:09:00.001+05:30

, originally uploaded by krupali.

.

तुझ्या डोळ्यात किती
निरागस स्वप्नांची भरती आलीये
तुझे स्वप्नाळू डोळे
कसे जपावे हेच कळत नाहीये

चंगळवादाच्या उन्हात
प्रकृती तापून निघालिये
संस्कारांचा सन स्क्रीन
कसा लावू हेच कळत नाहीये

तू विचारशील उद्या
बाबा मी कुणासारखे होऊ
खरं उत्तर द्यायचं तर
कुणाचं नाव घेऊ हेच कळत नाहिये

तुषार जोशी, नागपूर

तन्मय तू

2008-01-07T22:40:00.001+05:30

girl mending the fishing net, originally uploaded by ToSStudio.

.

तन्मय तू विणताना
आयुष्याचे धागे
हारवले बघ हसणे
मागे किती मागे

जुळवत बस एकेका
धाग्याला हाताने
एकदाच हास बघू
सुटतिल का हसल्याने?

खूप कष्ट कर की गं
संघर्ष कर ना, कर
चेह-यावर हास्याचा
येऊदे गुलमोहर

तुषार जोशी, नागपूर

थांबायचे तर थांब

2007-12-17T09:08:00.001+05:30

brown, originally uploaded by Subodh.

.

थांबायचे तर थांब पण
हृदयाची नाही हमी
गितार घेऊन हृदयापासून
गातो असाच मी

शब्द सुरांच्या मैफिलीत
निघून जातील तास
किती बहरलो कसे बहकलो
नसेल हा अदमास

थांबायचे तर थांब पण
तुच ठरव किती
अश्रूंचे सगळे साठे
रिते होण्याची भीती

तुषार जोशी, नागपूर
१७ डिसेंबर २००७

चहाच्या पेल्यात

2007-12-17T08:14:00.001+05:30

brown, originally uploaded by krupali.

.

चहाच्या पेल्यात
हसणे तुझे विरघळले
वा-यावर शुन्यात
बघणे तुझे विरघळले

चहा पितांना देखील
मादक किती दिसावे
अंगांगात माझे
असणे तुझे विरघळले

चहा सारखी साधी
आठवण राहीली नाही
चहाच्या आठवणीत
दिसणे तुझे विरघळले

तुषार जोशी, नागपूर
१७ डिसेंबर २००७

संथपणाचा स्पर्श

2007-12-13T19:19:00.001+05:30

A river so restful..., originally uploaded by amrita b.

संथ वाहणारी नदी
पायाखाली वाळूची गादी
दोन पाय माझे
आणि जोडीला दोन तुझे
दूरपर्यंत पसरलेलं पात्र
प्रेमाने भरलेलं हृदयाच गात्र
संथ प्रेमाचा प्रवाह वाहतोय
तुझ्या पायातून माझ्या कडे
माझ्या जगण्याला अथांग
संथपणाचा स्पर्श घडे

तुषार जोशी, नागपूर

साठा

2007-06-07T10:14:00.001+05:30

beach view classroom, originally uploaded by amrita b.

.
.
जेव्हा जेव्हा कुणीच नसताना
झाडाखाली तुला भेटायला आलोय
सगळा ताप विसरून नवीन
इच्छा शक्तीचा कारखाना झालोय

तुझ्या केसात बोट फिरवून
पुन्हा तीव्र उर्जा घेतलीय
तुझ्या सुगंधात न्हाऊन नेहमीच
जुनी पुराणी कात टाकलीय

माझ्या जगण्यात असण्यात
तुझा सिंहाचा वाटा आहे
माझ्या प्रेमळ कविते तूच
माझा आशेचा साठा आहे

तुषार जोशी, नागपूर

भीती

2007-06-07T10:01:00.001+05:30

stomp, originally uploaded by amrita b.

.
.
अपयश ही एक स्थिती आहे
हे कळले की भीती जाते
अपयशाला वाकुल्या दाखवण्याचे
अंगामधे नवे बळ येते

कितीही विक्राळ दिसला
जरी परिस्थितीचा चेहरा
आपण धरून ठेवायचा असतो
आत्मविश्वासाचा दोरा

अपयश हा एक बागुलबोवा
हे कळणे महत्वाचे
त्यानंतर सारी रात्र
शांत निर्मळ झोप येते

तुषार जोशी, नागपूर

चमत्कार

2007-06-07T08:40:00.001+05:30

Limbonichya Zadamage......., originally uploaded by Hrishikesh Karanjikar.

.
.
चमत्कारावर माझा विश्वास नाही
मी त्याच्या भरवशावर जगतेय
माझ्या स्वप्नातला सखा अचानक
मला साक्षात भेटलेला बघतेय

मनापासून तुझी कशी झाले यावर
सहज कुणाचा विश्वास बसेल का?
माझ्यासारखे सोनेरी भाग्य घेऊन
या जगात कुणी तरी असेल का?

तुझ्या विचारात दिवस आणि रात्र
आताशा चिंब चिंब भीजलेली असते
दिवस असे मस्त छान जात आहेत
की मला वेळेचे मुळी भानच नसते

चमत्कारावर माझा विश्वास नाही
मी त्याच्या भरवशावर जगतेय
तुझ्या विचारात तुझ्या स्वनात
न्हाऊन अगदी नखशिखांत सजतेय

तुषार जोशी, नागपूर

तुझ्यात आहे

2007-06-06T23:28:00.000+05:30

group effort, originally uploaded by amrita b.

.
.
तुला नक्कीच जमेल
जमवायची शक्ती तुझ्यात आहे
तुला नक्कीच सुचेल
सृजनशील युक्ती तुझ्यात आहे

विकासाचे धडे
आपण पडल्यावरच शिकतो
पडून पुन्हा उठतो
तो नेहमीच टिकतो
तुला यश मिळेल
प्रयत्नशील वृत्ती तुझ्यात आहे

तुला नक्कीच जमेल
जमवायची शक्ती तुझ्यात आहे

जेव्हा जमत नाही
तेव्हा मन जरा खचतं
तुला जमेल विश्वास ठेव
म्हटल्यावरती हसतं
तुझा विश्वास बसेल
सद्विवेक बुद्धी तुझ्यात आहे

तुला नक्कीच जमेल
जमवायची शक्ती तुझ्यात आहे

- तुषार जोशी, नागपूर

संगत

2007-05-14T21:33:00.001+05:30

stage setting 1, originally uploaded by mayuresh tendulkar.

.
.
पेटी तबला सोबत संगत
जुळून आली म्हणजे रमते
मैफिल वेड्या सुरतालाची
नाद स्वरांची खासच जमते

मैफिलीत या कुणी न छोटा
सगळे घेऊन येती उत्तम
वेगवेगळे गूण मिळोनी
स्वर जागर घडतो सर्वोत्तम

व्यक्ती अपुले गुण सर्वोत्तम
कामामध्ये देता झाला
तर शिखरावर घेऊन जाउ
आपण अपुल्या या देशाला

तुषार जोशी, नागपूर

आंब्याची पोळी

2007-05-12T10:00:00.002+05:30

(Image courtesy tamadhanaval)

ताटात सजवून ठेवलेल्या

रसाळ आंब्याच्या फोडी

मनमुग्ध करणारी त्यांची

जगावेगळी गोडी

त्यानंतर आंब्याचा रस

त्यावर भरपूर तूप

जेवण होईपर्यंत

सगले एकदम चूप

नंतर आंब्याची पोळी

तिची वेगळीच मजा

वाळण्या आधीच पाडायचा

आम्ही तिचा फज्जा

अचूक लक्षात ठेऊन

माझी आंब्याची आवड

याला सगले मिळाले पाहिजे

म्हणून तुझी धडपड

आंबा बघतांना पण आई

तुझे प्रेम जाणवते

त्याची गोडी माझ्या

जगण्याचे बळ वाढवते

तुषार जोशी, नागपूर

श्रेय

2007-05-10T07:46:00.002+05:30

(छायाचित्र सौजन्य तुनाचिली)

दवबिंदू

तुझे पानावर असून

स्वतंत्र असण्याचे

मला कौतुक वाटायचे

हेच जगणे,

काय ते सौंदर्य!

सर्वात राहूनही

वेगळेपण गाठायचे

कमलदला

नंतर कळले मला

दवाच्या सौंदर्यात

अधिक श्रेय तुझे

तुझ्या आधाराने

फुलत गेले आहे

आकर्षक अस्तित्व

दवबिंदूचे

बाबा

आज मी स्वतंत्र आहे

दवबिंदू सारखा

सुंदर आणि सफल

बाबा

आज कळते आहे

माझ्या अस्तित्वा साठी

तू आहेस कमलदल

तुषार जोशी, नागपूर

किती रंग

2007-05-06T12:17:00.001+05:30

colored feet....or colored socks...!!!! ;), originally uploaded by mugdha.b.

.
.
किती रंग राहून गेलेत
अजुनही घालायचे
किती छंद राहून गेलेत
अजुन जोपासायचे

किती पुस्तके किती कविता
वाचू कसे आणि कधी
भांडार जणू सागर विशाल
थेंबाइतका दिलाय अवधी

सगळे करणे शक्यच नाही
स्वीकारतो शांत होतो
जवळचा पहिला रंग घेतो
पुन्हा प्रवास सुरू करतो

तुषार जोशी, नागपूर

चायनीज नुडल्स

2007-05-04T23:31:00.001+05:30

petpuja....., originally uploaded by sonal chitnis.

.
.
चायनीज नुडल्स आ हा हा
चायनीज नुडल्स
पोळी भाजी भाताचे घ्या
एकत्रच सगळे रस
चायनीज नुडल्स आ हा हा
चायनीज नुडल्स

तो चिनी बाबा आला तर
वाटीत जीव द्यायचा
पंजाबी मसाल्यांचा वास
त्याचा नाकात इतका जायचा
आपली परंपरा नेहमी
आहार असावा सकस
चायनीज नुडल्स आ हा हा
चायनीज नुडल्स

दोन काड्या सोडून आपण
घेतला हातात काटा
कोणत्याही देशाचे पदार्थ असो
आमचा असतोच वाटा
खायच्या बाबतीत सगळ्यांचे स्वागत
कुणाचाही नाही आकस
चायनीज नुडल्स आ हा हा
चायनीज नुडल्स

तुषार जोशी, नागपूर

दोरी

2007-05-03T09:37:00.001+05:30

bondage !!, originally uploaded by arkoprovo.

.
.
एक मुलगी होती मनाने खूप चांगली
पण नशिबाने तिच्याशी क्रूर थट्ट मांडली

तिने ज्याच्यात पाहिले भविष्याचे चित्र
तो म्हणाला आपण राहू नुसते मित्र

मग तिला वाटले जगणे आता संपले
वाढण्या आधिच आनंदाचे रोप माझे खुंटले

मग तिला लागला एकटे राहण्याचा छंद
आपल्याच कोषात तिने केले स्वतःला बंद

एकदा एक मित्र तिला अडवून म्हणाला
काय हरवले? का बांधलेस का असे स्वतःला?

तू गमावलास व्यक्ती ज्याचे प्रेम तुझ्यावर नव्हते
त्याने गमावले प्रेम तुझे जीवापाड जे होते

हे ऐकताच ती हसली, विचार करत बसली
स्वतःच घातलेल्या बंधनांची दोरी हळूच सुटली

तुषार जोशी, नागपूर

खिडकी

2007-05-03T09:37:00.000+05:30

DSC08064, originally uploaded by mayuresh tendulkar.

अपुल्या डोळ्यांची खिडकी
फारच छोटी असते
आयुष्याची खोली
अफाट मोठी असते

जे दिसतं ते सत्याच्या
अंशा इतकं असतं
जे असतं ते बहुसंख्य
पदर घेउनी असतं

इतरांचे मग आपण
मोल कसे ठरवावे?
कोण कसे आहे का
निर्णय असले घ्यावे

तुषार जोशी, नागपुर

बाबा तू आहे ना

2007-04-26T21:34:00.001+05:30

DSC01326(2), originally uploaded by Shailesh Johar.

.
.
थोडीशी घाबरते
सायकल वर बसताना
तरीही बसते कारण
बाबा तू आहे ना

वेगाने धावणार
हे जगणे जगताना
पडले तर उचलाया
बाबा तू आहे ना

द बेस्ट माझा बाबा
सांगणार सगळ्यांना
कारण माझा द बेस्ट
बाबा तू आहे ना

तुषार जोशी, नागपूर

चेहरा

2007-04-25T21:44:00.001+05:30

Morning Glory, originally uploaded by tusharvjoshi.

.
.
सकाळी सकाळी
तुझा मोहक चेहरा पाहून
वाटणारा आनंद
शब्दांत सांगण्या पलीकडे

सकाळी सकाळी
तुझा मोहक चेहरा पाहून
दरवळणारा सुगंध
मी वाटतो चोहीकडे

सकाळी सकाळी
तुझा मोहक चेहरा पाहून
दिवसाला सुरवात केली
की वाटत नाही कामाचा ताप

सकाळी सकाळी
तुझा मोहक चेहरा पाहून
माझ्या मनाची कळी
फुलत राहते आपोआप

तुषार जोशी, नागपूर

तुझे घारे डोळे

2007-04-25T10:15:00.000+05:30

Neerajaa, originally uploaded by tusharvjoshi.

.
.
तुझे घारे डोळे
व्याकुळली मूर्ती
मला दिसते
मनाच्या चेनल वर
आणि एक्सलेटर वर
पाय आणिच दाबल्या जातो

माझी वाट बघत
तुझी होणारी तगमग
पोचते वाऱ्याबरोबर
माझ्या श्वासा श्वासात
आणि माझाही जीव
धडधडतो कासावीस होतो

आपले प्राण
आपण घरीच ठेवून आलोय
आणि कसे तरी तगलोय
याचा रोज घरी जातांना
मला असाच प्रत्यय येतो

तुषार जोशी, नागपूर

बसू नकोस

2007-04-24T21:44:00.001+05:30

high hopes !!, originally uploaded by arkoprovo.

.
.
वादळ वारा येईल
समजून खचू नकोस
पंख उघडून उडू लाग
बसू नकोस

बसणाऱ्याला आकाश
मुळीच मिळत नसतं
उडल्याशिवाय आपलं किती
कळत नसतं

तुषार जोशी, नागपूर

डोळ्यात थेट माझ्या

2007-04-24T18:37:00.001+05:30

DSC07963, originally uploaded by mayuresh tendulkar.

डोळ्यात थेट माझ्या स्वप्न कोरलेले
ध्येय प्राप्ती साठी चित्त भारलेले

माझ्या समोर माझे ध्येय फक्त आता
अन्य सर्व काही केव्हाच सोडलेले

यशाकडेच माझा नेम साधलेला
नेत्र बाण माझे तिक्ष्ण रोखलेले

तुषार जोशी, नागपूर

तू चित्र मुग्ध ऐकतेस

2007-04-23T21:55:00.001+05:30

Dhunda yeth mi......, originally uploaded by Hrishikesh Karanjikar.

.
.
तू चित्र मुग्ध ऐकतेस
वाटतं बोलणं थाबवून
नुसतच बघावं
किंवा
बोलत रहावं
दिवस रात्र आणि
तुला डोळ्यांनी साठवावं

तू चित्र मुग्ध ऐकतेस
वाटतं पटकन
फोटो काढावा
जवळ पास कुणी नसतांना
तोच काढून
समोर लावावा

तू चित्र मुग्ध ऐकतेस
बोलण्याचं ही
अगदी होतं सार्थक
शब्दांना नवे अर्थ
प्राप्त होतात
कधी जरी असले निरर्थक

तू चित्र मुग्ध ऐकतेस
तुझी ही
पद्धत निराळी
तुला नेमकं ठाऊक आहे
कशी फुलवायची
कोमेजली कळी

तुषार जोशी, नागपूर

सिलेबस

2007-04-23T21:25:00.001+05:30

braindead....!!!, originally uploaded by sonal chitnis.

.
.
आयुष्याचा सिलेबस
आधीच का नाही दिला
खूप अभ्यास करून
मोकळा झालो असतो

मैत्री नाती व्यवसाय
सगळ्यांमध्ये
पैकी च्या पैकी गुण
घेऊन आलो असतो

आयुष्याचा सिलेबस
आधीच का नाही दिला
कुठे गड्डा आहे
आधिच कळले असते

काही विषयात
आमची शोभा होणे
अगदीच शुन्य मिळणे
तरी टळले असते

तुषार जोशी, नागपूर

तुझे डोळे

2007-04-23T19:18:00.001+05:30

dole kasha sathi....???, originally uploaded by sonal chitnis.

.
.
तुझे डोळे
प्रकाशतात
माझ्या अंधःकारात
आणि मला माझी
वाट सापडते

तुझे डोळे
अखंड अविरत
तेवत राहतात हृदयात
आणि मला हे जगणे
खूप आवडते

तुझे डोळे
सूर्य होतात
माझ्या पाना पानांसाठी
आणि माझे अस्तित्व
हिरवे होते

तुषार जोशी, नागपूर