थांबायचे तर थांब

brown, originally uploaded by Subodh.

.


थांबायचे तर थांब पण
हृदयाची नाही हमी
गितार घेऊन हृदयापासून
गातो असाच मी

शब्द सुरांच्या मैफिलीत
निघून जातील तास
किती बहरलो कसे बहकलो
नसेल हा अदमास

थांबायचे तर थांब पण
तुच ठरव किती
अश्रूंचे सगळे साठे
रिते होण्याची भीती

तुषार जोशी, नागपूर
१७ डिसेंबर २००७

चहाच्या पेल्यात

brown, originally uploaded by krupali.

.

चहाच्या पेल्यात
हसणे तुझे विरघळले
वा-यावर शुन्यात
बघणे तुझे विरघळले

चहा पितांना देखील
मादक किती दिसावे
अंगांगात माझे
असणे तुझे विरघळले

चहा सारखी साधी
आठवण राहीली नाही
चहाच्या आठवणीत
दिसणे तुझे विरघळले

तुषार जोशी, नागपूर
१७ डिसेंबर २००७

संथपणाचा स्पर्श

A river so restful..., originally uploaded by amrita b.

संथ वाहणारी नदी
पायाखाली वाळूची गादी
दोन पाय माझे
आणि जोडीला दोन तुझे
दूरपर्यंत पसरलेलं पात्र
प्रेमाने भरलेलं हृदयाच गात्र
संथ प्रेमाचा प्रवाह वाहतोय
तुझ्या पायातून माझ्या कडे
माझ्या जगण्याला अथांग
संथपणाचा स्पर्श घडे

तुषार जोशी, नागपूर

साठा

beach view classroom, originally uploaded by amrita b.

.
.
जेव्हा जेव्हा कुणीच नसताना
झाडाखाली तुला भेटायला आलोय
सगळा ताप विसरून नवीन
इच्छा शक्तीचा कारखाना झालोय

तुझ्या केसात बोट फिरवून
पुन्हा तीव्र उर्जा घेतलीय
तुझ्या सुगंधात न्हाऊन नेहमीच
जुनी पुराणी कात टाकलीय

माझ्या जगण्यात असण्यात
तुझा सिंहाचा वाटा आहे
माझ्या प्रेमळ कविते तूच
माझा आशेचा साठा आहे

तुषार जोशी, नागपूर

भीती

stomp, originally uploaded by amrita b.

.
.
अपयश ही एक स्थिती आहे
हे कळले की भीती जाते
अपयशाला वाकुल्या दाखवण्याचे
अंगामधे नवे बळ येते

कितीही विक्राळ दिसला
जरी परिस्थितीचा चेहरा
आपण धरून ठेवायचा असतो
आत्मविश्वासाचा दोरा

अपयश हा एक बागुलबोवा
हे कळणे महत्वाचे
त्यानंतर सारी रात्र
शांत निर्मळ झोप येते

तुषार जोशी, नागपूर

चमत्कार

Limbonichya Zadamage......., originally uploaded by Hrishikesh Karanjikar.

.
.
चमत्कारावर माझा विश्वास नाही
मी त्याच्या भरवशावर जगतेय
माझ्या स्वप्नातला सखा अचानक
मला साक्षात भेटलेला बघतेय

मनापासून तुझी कशी झाले यावर
सहज कुणाचा विश्वास बसेल का?
माझ्यासारखे सोनेरी भाग्य घेऊन
या जगात कुणी तरी असेल का?

तुझ्या विचारात दिवस आणि रात्र
आताशा चिंब चिंब भीजलेली असते
दिवस असे मस्त छान जात आहेत
की मला वेळेचे मुळी भानच नसते

चमत्कारावर माझा विश्वास नाही
मी त्याच्या भरवशावर जगतेय
तुझ्या विचारात तुझ्या स्वनात
न्हाऊन अगदी नखशिखांत सजतेय

तुषार जोशी, नागपूर

तुझ्यात आहे

group effort, originally uploaded by amrita b.

.
.
तुला नक्कीच जमेल
जमवायची शक्ती तुझ्यात आहे
तुला नक्कीच सुचेल
सृजनशील युक्ती तुझ्यात आहे

विकासाचे धडे
आपण पडल्यावरच शिकतो
पडून पुन्हा उठतो
तो नेहमीच टिकतो
तुला यश मिळेल
प्रयत्नशील वृत्ती तुझ्यात आहे

तुला नक्कीच जमेल
जमवायची शक्ती तुझ्यात आहे

जेव्हा जमत नाही
तेव्हा मन जरा खचतं
तुला जमेल विश्वास ठेव
म्हटल्यावरती हसतं
तुझा विश्वास बसेल
सद्विवेक बुद्धी तुझ्यात आहे

तुला नक्कीच जमेल
जमवायची शक्ती तुझ्यात आहे

- तुषार जोशी, नागपूर

संगत

stage setting 1, originally uploaded by mayuresh tendulkar.

.
.
पेटी तबला सोबत संगत
जुळून आली म्हणजे रमते
मैफिल वेड्या सुरतालाची
नाद स्वरांची खासच जमते

मैफिलीत या कुणी न छोटा
सगळे घेऊन येती उत्तम
वेगवेगळे गूण मिळोनी
स्वर जागर घडतो सर्वोत्तम

व्यक्ती अपुले गुण सर्वोत्तम
कामामध्ये देता झाला
तर शिखरावर घेऊन जाउ
आपण अपुल्या या देशाला

तुषार जोशी, नागपूर

आंब्याची पोळी

(Image courtesy tamadhanaval)

.

ताटात सजवून ठेवलेल्या

रसाळ आंब्याच्या फोडी

मनमुग्ध करणारी त्यांची

जगावेगळी गोडी

त्यानंतर आंब्याचा रस

त्यावर भरपूर तूप

जेवण होईपर्यंत

सगले एकदम चूप

नंतर आंब्याची पोळी

तिची वेगळीच मजा

वाळण्या आधीच पाडायचा

आम्ही तिचा फज्जा

अचूक लक्षात ठेऊन

माझी आंब्याची आवड

याला सगले मिळाले पाहिजे

म्हणून तुझी धडपड

आंबा बघतांना पण आई

तुझे प्रेम जाणवते

त्याची गोडी माझ्या

जगण्याचे बळ वाढवते

तुषार जोशी, नागपूर

श्रेय

(छायाचित्र सौजन्य तुनाचिली)

.

दवबिंदू

तुझे पानावर असून

स्वतंत्र असण्याचे

मला कौतुक वाटायचे

हेच जगणे,

काय ते सौंदर्य!

सर्वात राहूनही

वेगळेपण गाठायचे

कमलदला

नंतर कळले मला

दवाच्या सौंदर्यात

अधिक श्रेय तुझे

तुझ्या आधाराने

फुलत गेले आहे

आकर्षक अस्तित्व

दवबिंदूचे

बाबा

आज मी स्वतंत्र आहे

दवबिंदू सारखा

सुंदर आणि सफल

बाबा

आज कळते आहे

माझ्या अस्तित्वा साठी

तू आहेस कमलदल

तुषार जोशी, नागपूर

किती रंग

colored feet....or colored socks...!!!! ;), originally uploaded by mugdha.b.

.
.
किती रंग राहून गेलेत
अजुनही घालायचे
किती छंद राहून गेलेत
अजुन जोपासायचे

किती पुस्तके किती कविता
वाचू कसे आणि कधी
भांडार जणू सागर विशाल
थेंबाइतका दिलाय अवधी

सगळे करणे शक्यच नाही
स्वीकारतो शांत होतो
जवळचा पहिला रंग घेतो
पुन्हा प्रवास सुरू करतो

तुषार जोशी, नागपूर

चायनीज नुडल्स

petpuja....., originally uploaded by sonal chitnis.

.
.
चायनीज नुडल्स आ हा हा
चायनीज नुडल्स
पोळी भाजी भाताचे घ्या
एकत्रच सगळे रस
चायनीज नुडल्स आ हा हा
चायनीज नुडल्स

तो चिनी बाबा आला तर
वाटीत जीव द्यायचा
पंजाबी मसाल्यांचा वास
त्याचा नाकात इतका जायचा
आपली परंपरा नेहमी
आहार असावा सकस
चायनीज नुडल्स आ हा हा
चायनीज नुडल्स

दोन काड्या सोडून आपण
घेतला हातात काटा
कोणत्याही देशाचे पदार्थ असो
आमचा असतोच वाटा
खायच्या बाबतीत सगळ्यांचे स्वागत
कुणाचाही नाही आकस
चायनीज नुडल्स आ हा हा
चायनीज नुडल्स

तुषार जोशी, नागपूर

दोरी

bondage !!, originally uploaded by arkoprovo.

.
.
एक मुलगी होती मनाने खूप चांगली
पण नशिबाने तिच्याशी क्रूर थट्ट मांडली

तिने ज्याच्यात पाहिले भविष्याचे चित्र
तो म्हणाला आपण राहू नुसते मित्र

मग तिला वाटले जगणे आता संपले
वाढण्या आधिच आनंदाचे रोप माझे खुंटले

मग तिला लागला एकटे राहण्याचा छंद
आपल्याच कोषात तिने केले स्वतःला बंद

एकदा एक मित्र तिला अडवून म्हणाला
काय हरवले? का बांधलेस का असे स्वतःला?

तू गमावलास व्यक्ती ज्याचे प्रेम तुझ्यावर नव्हते
त्याने गमावले प्रेम तुझे जीवापाड जे होते

हे ऐकताच ती हसली, विचार करत बसली
स्वतःच घातलेल्या बंधनांची दोरी हळूच सुटली

तुषार जोशी, नागपूर

खिडकी

DSC08064, originally uploaded by mayuresh tendulkar.

अपुल्या डोळ्यांची खिडकी
फारच छोटी असते
आयुष्याची खोली
अफाट मोठी असते

जे दिसतं ते सत्याच्या
अंशा इतकं असतं
जे असतं ते बहुसंख्य
पदर घेउनी असतं

इतरांचे मग आपण
मोल कसे ठरवावे?
कोण कसे आहे का
निर्णय असले घ्यावे

तुषार जोशी, नागपुर

बाबा तू आहे ना

DSC01326(2), originally uploaded by Shailesh Johar.

.
.
थोडीशी घाबरते
सायकल वर बसताना
तरीही बसते कारण
बाबा तू आहे ना

वेगाने धावणार
हे जगणे जगताना
पडले तर उचलाया
बाबा तू आहे ना

द बेस्ट माझा बाबा
सांगणार सगळ्यांना
कारण माझा द बेस्ट
बाबा तू आहे ना

तुषार जोशी, नागपूर

चेहरा

Morning Glory, originally uploaded by tusharvjoshi.

.
.
सकाळी सकाळी
तुझा मोहक चेहरा पाहून
वाटणारा आनंद
शब्दांत सांगण्या पलीकडे

सकाळी सकाळी
तुझा मोहक चेहरा पाहून
दरवळणारा सुगंध
मी वाटतो चोहीकडे

सकाळी सकाळी
तुझा मोहक चेहरा पाहून
दिवसाला सुरवात केली
की वाटत नाही कामाचा ताप

सकाळी सकाळी
तुझा मोहक चेहरा पाहून
माझ्या मनाची कळी
फुलत राहते आपोआप

तुषार जोशी, नागपूर

तुझे घारे डोळे

Neerajaa, originally uploaded by tusharvjoshi.

.
.
तुझे घारे डोळे
व्याकुळली मूर्ती
मला दिसते
मनाच्या चेनल वर
आणि एक्सलेटर वर
पाय आणिच दाबल्या जातो

माझी वाट बघत
तुझी होणारी तगमग
पोचते वाऱ्याबरोबर
माझ्या श्वासा श्वासात
आणि माझाही जीव
धडधडतो कासावीस होतो

आपले प्राण
आपण घरीच ठेवून आलोय
आणि कसे तरी तगलोय
याचा रोज घरी जातांना
मला असाच प्रत्यय येतो

तुषार जोशी, नागपूर

बसू नकोस

high hopes !!, originally uploaded by arkoprovo.

.
.
वादळ वारा येईल
समजून खचू नकोस
पंख उघडून उडू लाग
बसू नकोस

बसणाऱ्याला आकाश
मुळीच मिळत नसतं
उडल्याशिवाय आपलं किती
कळत नसतं

तुषार जोशी, नागपूर

डोळ्यात थेट माझ्या

DSC07963, originally uploaded by mayuresh tendulkar.

डोळ्यात थेट माझ्या स्वप्न कोरलेले
ध्येय प्राप्ती साठी चित्त भारलेले

माझ्या समोर माझे ध्येय फक्त आता
अन्य सर्व काही केव्हाच सोडलेले

यशाकडेच माझा नेम साधलेला
नेत्र बाण माझे तिक्ष्ण रोखलेले

तुषार जोशी, नागपूर

तू चित्र मुग्ध ऐकतेस

Dhunda yeth mi......, originally uploaded by Hrishikesh Karanjikar.

.
.
तू चित्र मुग्ध ऐकतेस
वाटतं बोलणं थाबवून
नुसतच बघावं
किंवा
बोलत रहावं
दिवस रात्र आणि
तुला डोळ्यांनी साठवावं

तू चित्र मुग्ध ऐकतेस
वाटतं पटकन
फोटो काढावा
जवळ पास कुणी नसतांना
तोच काढून
समोर लावावा

तू चित्र मुग्ध ऐकतेस
बोलण्याचं ही
अगदी होतं सार्थक
शब्दांना नवे अर्थ
प्राप्त होतात
कधी जरी असले निरर्थक

तू चित्र मुग्ध ऐकतेस
तुझी ही
पद्धत निराळी
तुला नेमकं ठाऊक आहे
कशी फुलवायची
कोमेजली कळी

तुषार जोशी, नागपूर

सिलेबस

braindead....!!!, originally uploaded by sonal chitnis.

.
.
आयुष्याचा सिलेबस
आधीच का नाही दिला
खूप अभ्यास करून
मोकळा झालो असतो

मैत्री नाती व्यवसाय
सगळ्यांमध्ये
पैकी च्या पैकी गुण
घेऊन आलो असतो

आयुष्याचा सिलेबस
आधीच का नाही दिला
कुठे गड्डा आहे
आधिच कळले असते

काही विषयात
आमची शोभा होणे
अगदीच शुन्य मिळणे
तरी टळले असते

तुषार जोशी, नागपूर

तुझे डोळे

dole kasha sathi....???, originally uploaded by sonal chitnis.

.
.
तुझे डोळे
प्रकाशतात
माझ्या अंधःकारात
आणि मला माझी
वाट सापडते

तुझे डोळे
अखंड अविरत
तेवत राहतात हृदयात
आणि मला हे जगणे
खूप आवडते

तुझे डोळे
सूर्य होतात
माझ्या पाना पानांसाठी
आणि माझे अस्तित्व
हिरवे होते

तुषार जोशी, नागपूर

आज आठवू

08-04-8, originally uploaded by Prasad D.

रोज रोज भांडणे आज आठवू
रात्र रात्र जागणे आज आठवू

देत घेत खायचा शाळेचा डबा
शाळेचे चांदणे आज आठवू

दादला तुला कसा मला कसा हवा
स्वप्नांचे पाहणे आज आठवू

फिरून आज घालूया हात साखळी
तळव्यांवर नाचणे आज आठवू

तुषार जोशी, नागपूर

वायोलीनच्या तारांवर

sur yeti......wirun jati.....!!!, originally uploaded by sonal chitnis.

वायोलीनच्या तारांवर
संगीत कोरतो आहेस
हृदयामध्ये आर्त रूपाने
तूच पोचतो आहेस

नाद तुझ्या तारांचे करती
मन्त्र मुग्ध मनाला
जगणे सुंदर आहे प्रत्यय
येतो क्षणाला क्षणाला

तुषार जोशी, नागपूर

शिंपला

08-04-07_1711, originally uploaded by Prasad D.

आज रोहन ने मला
एक शिंपला दिला
आणि मी त्याला
माझा खाऊ

रोहन वेडाच आहे
पाहून चालत नाही
मग झाला ना
हाताला केव्हढा बाऊ

ए तू माझ्याशी
खेळायला येशील
आपण गम्मत
करायला जाऊ

मी तुला माझा
शिंपला दाखवीन
आपण मस्त
शिंपला पाहू

तुषार जोशी, नागपूर

खाली बघणे

Zuki Zuki si Nazar.....Bekaraar hai ke Nahi !!!!!!!!, originally uploaded by Hrishikesh Karanjikar.

हृषिकेश, मित्रा मोबाईल छायाचित्रकारीता अशी शाखाच काढायला हवी आता तुझ्या मोबाईल छायाचित्रांकडे पाहून. एक रसिक म्हणून मी जेव्हा या छायाचित्राकडे बघतो तेव्हा माझ्या मनात जे भाव येतात ते इथे मांडतो आहे. कदाचित ते मुळात असणाऱ्या मूड सारखे नसतीलही, पण मला हे छायाचित्र जसे भेटले तसेच मी मांडणे महत्वाचे, ही घे एका रसिकाची शब्दचित्र भेट

तुझं नेहेमीचंच आहे
उत्तर द्यायचे नसले
म्हणजे..
बोटांशी खेळत ..
खाली बघणे.

मग हळूच वर बघत ..
गोड हसणे,
आणि म्हणणे..
जाउदे रे! चल दुसरे काही बोलू.

पण आज
तुझ्या रेशमी,
केसांची शपथ..

आज मी
तुझे दोन्ही हात,
हातात घेऊन..
खाली बसुन,
तुला विचारणार आहे.

म्हणजे तुला ..
खाली बघितल्यावर ही,
मीच दिसणार.
मग म्हणून दाखव,
जाऊदे रे! चल दुसरे काही बोलू.

तुषार जोशी, नागपूर

खुन्नस

Agressive thinking........, originally uploaded by Hrishikesh Karanjikar.

हृषिकेश, खूपच झकास टिपली आहेस रे खुन्नस. मी माझा एक अर्थ ठेवतो त्या क्षणावर. हे वाचून पुन्हा बघ ते छायाचित्र. कसे वाटले?

रे आयुष्या किती कष्ट देशील मला रे
बघ तू निश्चय मी ही पुरून उरेन तुला रे

टाक टाक अडचणी टाक तू हव्या तश्या
मी समजेन त्या सगळ्यांना पायऱ्या जश्या
त्याच पायऱ्यांनी चढेन पुढचा मजला रे
बघ तू निश्चय मी ही पुरून उरेन तुला रे

आता पुन्हा तुझ्याशी खुन्नस आहे माझी
मी झटकली कमकुवत विचारांची ओझी
आता सगळा माझ्यासाठी मार्ग खुला रे
बघ तू निश्चय मी ही पुरून उरेन तुला रे

तुषार जोशी, नागपूर

किती टक लावून बघशील?

sonal.....will u plz stop that now....???, originally uploaded by sonal chitnis.

हृषिकेश, मित्रा तुला पाहून खूप romantic mood झाला रे बाबा. मग मला काही शब्द लिहावेच लागले. तू पण वाच आणि आवडले तर कळव.

किती टक लावून बघशील?
मला लाज वाटते ना
आज काय डोळ्यांनीच
खाऊन टाकायचेय का?

आता तुला विचारायची
गरजच उरली नाही
कशी दिसतेय तुझे डोळेच
सांगताहेत सगळे काही

किती टक लावून बघशील?
सगळ्यांना कळेल ना
आपली गम्मत आताच
सांगून टाकायचीय का?

जा बाई मीच जाते
सगळ्यांना नाहीतर दिसणार
गालावरच्या लालीचे
काय कारण सागणार?

तुषार जोशी, नागपूर

पदचिन्हे

00220029, originally uploaded by wingsofphoenix1.

ही पदचिन्हे पाहून कितीतरी विचार मनात येतात. त्यातले हे तीन विचार त्यात प्रखर आहेत. छायाचित्रकाराने आपले नाव wings-of-phoenix त्या छायाचित्रकाराचे अभिनंदन.

ही पदचिन्हे शिकवतात मज काही
या जगतामध्ये मीच एकटा नाही

इथे कुणी आले अन चालत गेले
हा विचार निव्वळ आहे आशादायी

एक सही तर मीही ठेऊन जाईन
घेऊन माझ्या पदचिन्हांची शाई

तुषार जोशी, नागपूर

गान समाधी

DSC07055, originally uploaded by mayuresh tendulkar.

मयुरेष ने जो क्षण इथे टिपलाय त्याला माझा सलाम. पाहतांना माझे क्षण संगितमय झाले. त्याच्या छायाचित्राला माझा हा शब्दचित्र सलाम...

आलाप असा की नव चैतन्य जागे
तृप्त मनाने गान समाधी लागे

एकेक सूर उजळतो आयुष्याला
आनंद सुरांच्या धावे मागे मागे

मज कुणी नको साथ कराया आता
माझे जगणे तर फक्त सुरांनी भागे

आयुष्याचा रत्न जडित हा शेला
विणतो मी घेऊन सुरांचे धागे

तुषार जोशी, नागपूर

सागर गहिरे डोळे

ankhe bhi.....hoti hai dil ki juban..., originally uploaded by sonal chitnis.

सोनल ने टिपले, निखळ सौदर्य. बघता बघता लगेच म्हणावेसे वाटते की तुझ्या हासऱ्या चेहऱ्या मध्ये शुभ्र गोडवा इतका होता, दुःखही माझे विसरून गेलो, तुझ्या कडे मी बघता बघता. सोनल तुझ्या या छायाचित्रासाठी तुला एक चंद्र, आणि एक स्वप्नांचे गाव बक्षिस दिले गं.

हे सागर गहिरे डोळे, हसणे मंद
ही कुंतल नक्षी करतो वारा धुंद

मी बघता बघता उरलो नाही माझा
लागला मला तुजला बघण्याचा छंद

हे सागर गहिरे डोळे, हसणे मंद
ही कुंतल नक्षी करतो वारा धुंद

अत्तरे निकामी सगळ्या या शब्दांची
तू बघण्याने ही पसरवतेस सुगंध

मी बघता बघता उरलो नाही माझा
लागला मला तुजला बघण्याचा छंद

तुषार जोशी, नागपूर

मी वेचीत चालले

Picture 196, originally uploaded by Aditi Purohit.

अदिती, अगं काय वेचते आहेस कोण जाणे. मी मात्र शब्दवेणी विणली ग बाई. बघ आवडले का!

मी वेचीत चालले दिसेल त्या स्वप्नाला
मी छेडीत चालले सुरात आयुष्याला

मी सांगितले नाही जीवहा जडला माझा
तो सरळ सगळे सांगून मोकळा झाला
मी छेडीत चालले सुरात आयुष्याला

मी वेचीत चालले दिसेल त्या स्वप्नाला
मी छेडीत चालले सुरात आयुष्याला

मी टोपली भरून आनंद घेऊन आले
घे पांघर मला, चल विसर तुझ्या दुःखाला
मी छेडीत चालले सुरात आयुष्याला

मी वेचीत चालले दिसेल त्या स्वप्नाला
मी छेडीत चालले सुरात आयुष्याला

तुषार जोशी, नागपूर

या तारांवर

(छायाचित्र सौजन्य: प्रसाद दुधगावकर)

प्रसाद चे तल्लीनतेने तारा छेडण्याचे छायाचित्र आज पाहिले. त्याचा राजबिंडा चेहरा आणि तल्लीनता याने या छायाचित्राला वेगळीच चमक आली आहे. प्रसाद तुझ्या तल्लीनतेसाठी माझे हे शब्द चित्र..

मी वाजवतो मन गाणे या तारांवर
सुख दुःख येणे जाणे या तारांवर

ऐक जरा रे मित्रा बस बाजूला
आयुष्याचे उखाणे या तारांवर
सुख दुःख येणे जाणे या तारांवर

घे अशी तान तू मिसळ जीव सुरात
सोडून पुन्हा गाऱ्हाणे या तारांवर
सुख दुःख येणे जाणे या तारांवर

संगीत भीनले इतके, झोकून देतो
आयुष्याचे चार आणे या तारांवर
सुख दुःख येणे जाणे या तारांवर

तुषार आता नाद फुलांचे झेला
आनंदाचे तराणे या तारांवर
सुख दुःख येणे जाणे या तारांवर

तुषार जोशी, नागपूर

स्वप्नाळू डोळे

silence...whispers...!, originally uploaded by sonal chitnis.

किती स्वप्नाळू हे डोळे? यांना पडणारी स्वप्नेच भाग्यवान म्हणायची, हो ना?

या स्वप्नाळू डोळ्यांचे
होण्यास सदा झुरतात
तू जवळ करावे म्हणून
स्वप्न इथे फिरतात

तुला तुझ्या स्वप्नात
गुंग होतांना बघणे
म्हणजे माझ्यासाठी
विलक्षण अनुभव जगणे

तुषार जोशी, नागपूर

हास्याचे किटाणू

kahin pe nigahen...kahi pe nishana.., originally uploaded by sonal chitnis.

आता या मुलींना काय म्हणावे? निखळ हास्याचे किती कण यांनी हवेत सोडावे? मुलींनो हे घ्या तुमच्या हसण्यावर माझी दाद.

ती सकाळी सकाळी येते
हवेत प्रसन्न हास्याचे किटाणू
सोडून जाते

दिवस भर मी पछाडलेला
मधेच हसत असतो
तिचे स्मीत आठवत आठवत
हसणे पसरवत बसतो

प्रभाव संपत नाही
तो ती परत येते
माझ्याशी बोलता बोलता
गोड हसून घेते

हवेत प्रसन्न हास्याचे किटाणू
सोडून जाते

तुषार जोशी, नागपूर

तुझे हसणेच गोड

shiddharto roy........, originally uploaded by sonal chitnis.

सोनल ने काढलेली छायाचित्रे आधी मला फक्त आवडायची, पण आता मला त्यांनी झपाटल्यासारखे झालेय. हे छायाचित्र खूप निरागस आहे, आणि बघणाऱ्याच्या ही ओठांवर अवचित हास्य आणणारे आहे. बहोत खूब, सोनल. माझी ही एक भेट या छायाचित्राला...

तुझे हसणेच गोड
जशी कच्ची पेरूची फोड
तुझे हसणेच गोड

कुणी किती निखळ हसावं?
आणि किती निरागस दिसावं?
ज्याला कुठेच नाही तोड
तुझे हसणेच गोड

काजळलेल्या हृदयालाही
हळूच बहरून टाकायची
तुझी नेहमीचीच खोड
तुझे हसणेच गोड

तुषार जोशी, नागपूर

स्वच्छ हासणे

she seems beautiful.....bacause she is...!, originally uploaded by sonal chitnis.

स्वच्छ हासणे
तुझे कमाल गं
काळजामधे
घडे धमाल गं

श्वास चालणे
मधेच थांबतो
हृदयाचे किती
हाल हाल गं

केस मोकळे
हाय ही अदा
हाय घातकी
तुझी चाल ग

स्वच्छ हासणे
तुझे कमाल गं
काळजामधे
घडे धमाल गं

तुषार जोशी, नागपूर

तुझ्याशी फोनवर बोलतांना

her chromaaaaa..., originally uploaded by sonal chitnis.

सोनल चे हे छायाचित्र खूप झकास आहे. मन लावून फोनवर बोलणाऱ्या मुलीचे छायाचित्र म्हणूयात का याला?

तुझ्याशी

फोनवर बोलतांना

मी डोळे

बंद करते

तुझ्याशी

फोनवर बोलताना

मी फक्त तुझे

चित्र स्मरते

तुझ्याशी

फोनवर बोलतांना

ते म्हणतात मी

दिसते फार गोड

कदाचित ही असावी

तुझीच किमया तुझीच ओढ

तुझ्याशी

फोनवर बोलताना

मला तू

एकदाच बघ

तुला दिसेल

एक मुलगी

पूर्णपणे जी

विसरलीय जग

तुझ्याशी

फोनवर बोलतांना

तुषार जोशी, नागपूर

लख्ख प्रकाश

Beautiful !!!!!!!!!!, originally uploaded by Hrishikesh Karanjikar.

हृषिकेश च्या छायाचित्र संचावर आज हे छायाचित्र सापडले. चेहरा उजळला आहे की प्रकाश असे वाटावे इतके जिवंत चित्र आहे. हृषिकेश ही घे माझी शब्ददाद.

या दिव्यात
मंद रूप दर्वळे
मोहरले
स्मीतहास्य कोवळे

हा प्रकाश
आज वाटतो नवा
लख्ख पेटला
हृदयाचा दीवा

घडले तुला
दिव्यात पाहणे
फिटले डोळ्यांचे
आज पारणे

तुषार जोशी, नागपूर

किती बोलका हा चेहरा?

 

(छायाचित्र सौजन्य: सोनल करंजीकर)

सोनल च्या छायाचित्र संचात तिचेच हे छायाचित्र आज पाहिले. वा काय चित्र आहे आणि किती बोलके आहे अशी अवचित दाद आली मनातून.

सोनल हे तुझ्या या फोटोसाठी. तुझा हा फोटो बऱ्याच लोकांच्या हृदयात chemical reaction केल्याशिवाय राहणार नाही. माझ्या सारख्या शब्द चित्रकाराची दाद या शब्दात घे:

लाजलीस का?
सांग सांगू का?
चेहरा तुझा
किती गं बोलका

पापणीत काय
काय साठले?
दृष्ट काढूया
लगेच वाटले

पाहूनी तुला
सांग सांगू का?
जीव विरघळे
आज सारखा

रूप गोजिरे
वेड लावते
पाहताच हाय
दाद मागते

लाजलीस का?
सांग सांगू का?
चेहरा तुझा
किती गं बोलका

तुषार जोशी, नागपूर

जालपत्र चर्चा

हिन्दी मध्ये चिठ्ठा चर्चा नावाने लिलिल्या जाणा-या जालपात्राचा मी सदस्य आहे. हिन्दीत जे मजेदार लिखाण वाचायला मिळते तेच मराठीतही मुबलक प्रमाणात आहे आणि त्याची पण चर्चा, आलेख आपण सुरू करावा हे बरेच दिवसांपासून मनात होते.

आज जालपत्र चर्चा च्या माध्यामातून तो योग आला. आता या यात्रेत आणिक लेखकांना घेउन ही चर्चा खुसखुशीत करायचा प्रयत्न करणार.

तुषार जोशी, नागपूर

येता जाता

मराठी मधे पहिली गद्य नोंद - तुषार जोशी नागपूर