सोमवार, १३ जून, २०१६

ठसा

(छायाचित्रकार: पंकज बांदकर, छायाचित्र: विशाखा)
.
तुझे हसू  तुझी अदा झूळ झुळ वारा जसा
गालावर होई जणू मोरपिशी स्पर्शसा
.
रागावले त्रासलेले जरी डोके तापले
तुझ्या चाहुलीने माझे क्लेष जाती भागले
तुझ्यावर भिस्त माझी तुझ्यावर भरवसा
गालावर होई जणू मोरपिशी स्पर्शसा
.
तुझ्या साधेपणाचा गं दरवळ चोहीकडे
हरवता हसू माझे तुझ्या कडे सापडे
माझ्या मनी पडे तुझ्या असण्याचा कवडसा
गालावर होई जणू मोरपिशी स्पर्शसा
.
खेळकर खोडकर असे तुझे वागणे
तुला आठवत होते रात्र सारी जागणे
काळजात कोरलेला तुझा कायमचा ठसा
गालावर होई जणू मोरपिशी स्पर्शसा
.
तुष्की नागपुरी
नागपूर, १३ जून २०१६, १५:००

बुधवार, १ जून, २०१६

दोन गोष्टी

(छायाचित्र सौजन्य: मंजिरी)
.
.
मला दोन गोष्टी खूप आवडतात
अरिजित सिंग चा आवाज
आणि तू
.
मी तासंतास बसू शकतो
ऐकत त्याच्या गाण्यांना
आणि आठवत तुला, तुझ्या हावभावांना
.
तुझे बदामी ओठ
आणि ते चष्म्यातून बघणे
आठवले तरीही
अरिजित चे गाणे मनाच्या चेनल वर
वाजायला लागते
आणि त्याचे गाणे रेडियोवर लागले
की पुन्हा तुझी एक अदा आठवते
.
मला अंतर्बाह्य व्यापून टाकणा-या
जीव उधलून द्याव्यात अश्या
जगात दोनच गोष्टी
अप्रतीम सुंदर आहेत
अरिजित सिंग चा आवाज
आणि तू.
.
तुष्की नागपुरी
नागपूर, ०१ जून २०१६, १०:००

रविवार, २९ मे, २०१६

दिशा मुग्ध व्हाव्या अशी सावळी

(छायाचित्र सौजन्य: पूजा )
.
.
तिच्या पावलांना जरी खूप छाले
तरी थांबलेना तिचे चालणे
फुलोनी जगाला फुले गंध देती
तसे गंधवेडे तिचे हासणे
.
तिला लाभलेले जरी लाख काटे
फुले वाटते ती जगाला तरी
तिचे शब्द होतात फुंकर जगाला
जणू तप्त मातीत याव्या सरी
.
तिचे चित्र लावण्य साधेपणाचे
दिशा मुग्ध व्हाव्या अशी सावळी
जरी टाळले तू तरी प्रेम माझे
म्हणे जिंदगीला अशी ती खुळी
.
तुष्की नागपुरी
नागपूर, २९ मे २०१६, १०:००
9822220365

मंगळवार, २४ मे, २०१६

दोन्ही प्रियकर माझे

(छायाचित्र सौजन्य: प्रियंका )
.
.
सर्वदूर व्यापुनही उरती थोडे माझ्यासाठी
मनात भरती सदैव असती दोघे माझ्या पाठी
आकांक्षांचे सुखस्वप्नांचे नाते अथांगतेचे
समुद्र आणिक आसमंत हे दोन्ही प्रियकर माझे
.
सगळ्यांसाठी अखंड लाटा उधळून तो देणारा
सूर्य दिव्याने अनेक वाटा उजळून हा घेणारा
भरती ओहटी ऊन सरींचे नाते मोहरण्याचे
समुद्र आणिक आसमंत हे दोन्ही प्रियकर माझे
.
उदास असता मी, हसवी ओठांवर घेऊन लाली 
भरती होतो कधी गुदगुल्या करतो पाया खाली
साक्षी होऊन करती सांत्वन माझ्या सुखदुःखाचे
समुद्र आणिक आसमंत हे दोन्ही प्रियकर माझे
.
तुष्की नागपुरी
नागपूर, २४ मे २०१६, ०९:००

सोमवार, २३ मे, २०१६

तुझ्या सावळ्या सौंदर्याचा

(छायाचित्र सौजन्य: प्रियंका )
.
.
तुझ्या सावळ्या सौंदर्याचा डंख जिवाला जाळी
तरी पहावे वाटत असते तुलाच वेळोवेळी
अता कळाले कसा पतंगा पेट जीवाने घेतो
विणून घेतो ज्योती साठी जाळ स्वतःच्या भाळी
.
तुझे हासणे म्हणजे झुळझुळ धुंद नदीची गाणी
हनुवटीवर खळी जणू की असे सायीवर लोणी
बघता बघता जीव लागतो वितळत वितळत जातो
चेहरा कसला सावळ रंगी जणू कोरली लेणी
.
खट्याळ कथ्थई डोळ्यांमधुनी प्रकाश घरभर पसरे
तुझ्या चाहुली घेऊन येती सौख्याचे क्षण हसरे
तू बोलावे ऐकत जावे विसरून जग उरलेले
तूच उरावे मनात आणिक असो न काही दुसरे
.
तुझे मोकळे केस जणू वेड्या वळणांचा घाट
तुझ्या स्मृतींचा सुगंध उत्कट प्राजक्ताहुन दाट
शब्दांमध्ये तुला बांधूनी जरी उत्सव मी करतो
निशब्दाचा सागर तू तर गहिरा गूढ अफाट
.
तुष्की नागपुरी
नागपूर, २३ मी २०१६,२०:००

मंगळवार, २६ एप्रिल, २०१६

वळण

( छायाचित्र सौजन्य: अनुराधा
.
.
तुझ्या केसांचं ते अनोखं वळण
मला नेहमीच गोंधळात टाकतं
वाटतं कालच  पाहून आपण
आनंदलो होतो
तरी आज पुन्हा निरखत रहावसं  वाटतं
.
तुझं मोत्यांच्या दाण्यांचं हसणं
माझं आयुष्य प्रकाशमय करतं
सगळं जग अस्पष्ट होत जातं
मागे मागे
तुला आठवत राहणं इतकच फक्त उरतं
.
एक मन म्हणतं सांगूनच टाक
एक मन जरा थांब म्हणतं
माझ्या डोळ्यात तुला दिसतंय का
ठाऊक नाही
मन मनात तुझीच स्वप्ने विणतं
.
तुष्की नागपुरी
नागपूर , २५ एप्रिल २०१६, २३:००

शुक्रवार, २२ एप्रिल, २०१६

उखाणा

(छायाचित्र सौजन्य: प्राची )
.
.
तुझ्या डोळ्यात भेटते
मला स्वप्नांचे आभाळ
तुझे हसणे पाहून
होते आनंदी सकाळ
.
तुझ्या सावळ्या रंगाची
मनभावन मोहिनी
तुझ्या अस्तित्वाचा दंश
मनामध्ये पानोपानी
.
तुझी चाहूल रोमांच
तुझे नसणे काहूर
तुझे बोलणे मधाळ
कान नेहमी आतुर
.
रोज मनात उठतो
सूर एका प्रार्थनेचा
तुझ्या ओठास स्फुरावा
उखाणा माझ्या नावाचा
.
तुष्की नागपुरी
नागपूर , २२ एप्रिल  २०१६, १०:००

सोमवार, १४ मार्च, २०१६

खळी भोर गाली

(छायाचित्र सौजन्य: नम्रता
.
.
खळी भोर गाली अशी हासते ती
सुगंधित होती दिशांचे तुरे
तिचा स्पर्श होता फुलावी अबोली
व्यथा कोणतीही मनाला नुरे

खुले केस आभाळ दाटून येई
खुळा जीव डोळ्यांमधे दामिनी
क्षणे गोठती वेधुनी ठाव घेई
तिझ्या हावभावांतली मोहिनी

तिला पाहुनी वाटते सारखे की
मधाहूनही गोड हा गोडवा
तिच्या आठवांचे तळे पास माझ्या
सदोदीत तेथे सुखांचा थवा

तुष्की नागपुरी
नागपूर, 14 मार्च 2016, 08:30

शनिवार, २६ डिसेंबर, २०१५

ट्रेडीशनल डे

(छायाचित्र सौजन्य: यामिनी )
.
.


ट्रेडीशनल डे ला
तू साडी नेसून आलीस
आणि मला आपण हरीण असल्याची जाणीव झाली
साधेसुधे हरीण नाही
तर कस्तुरी चे हरीण
ज्याच्याजवळ कस्तुरी असते
एक आंतरिक आत्मिक सुगंध
पण ते कळायला
त्याचा जिवच जावा लागतो
आज तर तू माझा जीव घेतलास
तुला इतर वेळा पाहतांना
तू मनात भरत होतीस
आज मनाला आरपार चिरून गेलीस
तुझ्या त्या साडीमुळे फुलून आलेल्या वसंत वळीवाच्या सरींमधे चिंब होतच होतो
की तेवढ्यात तू मला आंधळा करून टाकलेस
तो आंधळा जो देवाला एक डोळा मागतो
आणि त्याला देव दोन डोळे देतो
तुझ्याकडे कितीवेळ एकटक पाहिले तर
'ओके आहे' याचा विचार सुरू असतानाच
म्हणालीस फोटो काढ ना माझे.
तुझ्या परवानगीनेच...
तुझ्याकडे एकटक पाहण्याचा परवाना
घेऊन, सुरू झाला माझा
तुला अनिमिष डोळ्यांनी पाहण्याचा
तुला डोळ्यात साठवण्याचा सोहळा
एक कौतुक भरून आलं डोळ्यात
की ही अदा, हे साडीमधे
चित्तवेधक वावरणे
हे हिला आधीपासूनच येत होते आणि
मोराने पिसारा फुलवल्याप्रमाणे
एकदम ही आपल्या सगळ्या अदा
घेऊन अशी आली आहे
जसा अचानक पहिल्या पावसानंतर
मृदगंधाने आसमंत भरून जावा
आणि जिवाला एक भारावून टाकणारा
रोमांचक अनुभव मिळावा
आता फक्त सेटिंगच करत राहणार आहेस
की क्लीक पण करणार आहेस
तू हटकल्यावर मी भानावर आलो
मग वेगवेगळ्या ऐंगल ने फोटो
काढतांना जाणवत गेलं की तू
एक केलिडोस्कोप आहेस जणू
प्रत्येक नव्या दिशेने
नवा धक्का देणारी
तू आज तुझं हे रूप दाखवून
या दिवान्याला
जे काही दिलस ते
आणि हा ट्रेडिशनल डे
मी कधी विसरणार नाही
तू तुझे हे साडीतले रूप घेऊन
तेवत राहशील मनभर
आठवणींच्या रूपात
.
.
(देवाशिषच्या कविता / तुष्की नागपुरी)
श्रीनगर, २५ डिसेंबर २०१५, १०:००

सोमवार, २१ डिसेंबर, २०१५

गॉगल

( छायाचित्र सौजन्य : संकेत )
.
.
तुझ्या डोळ्यांवर येता होतो गॉगल देखणा
उठून दिसे अजून रांगडा मराठी बाणा
.
गॉगलच्या पाठीमागे भाबडी आशा राहते
तुझी नजर चोरून माझ्याकडेच पाहते
.
चार चांद लावी असा गॉगलचा हा दागिना
दिसे माचोवानी रूप नजरच हटते ना
.
कितीक गॉगल वाले किती पाहिले गॉगल
तुझ्या डोळ्यांवर येता त्याची होतेया गजल
.
तुझे गॉगल घालणे तुझे जबरी हसणे
किती साहजिक आहे मन वेडे पिसे होणे
.
उन्ह तापले सभोती जरी रण रण खूप
शांत सावली घालते तुझे गॉगलचे रूप
.
तुझ्या गॉगल मधून साजे चमक उन्हाची
तुझ्या नजर मिठीत, ऊब हिवाळी उन्हाची
.
तुष्की नागपुरी
नागपूर, २१ डिसेंबर २०१५, १७:००

रविवार, २० डिसेंबर, २०१५

रूप असे की

( छायाचित्र सौजन्य: यामिनी )
.
.
रूप असे की जग सगळे हरवुनच  जावे
बघणारा मी आणिक तू ईतकेच उरावे

रूप असे की कणा कणातुन गोड शहारा
अलगद गालांवर फिरणारा मोरपिसारा

रूप असे की श्वासांचे होतात उसासे
मनास सावरण्याला स्वप्नांचेच दिलासे

रूप असे की ऐटीत गागल केस मोकळे
हृदयाची धडधड थांबवू कशी ना कळे

रूप असे की बघता बघता वेडे होणे
खुळ्या सारखे विचारात मग गुंतुन जाणे

तुष्की नागपुरी
नागपूर, १९ डिसेंबर २०१५, २२:००

गुरुवार, १५ ऑक्टोबर, २०१५

नकोसा भाग

(छायाचित्र सौजन्य: लीन )
.
.
मी पूर्णच आहे.
आखिव रेखीव घडलेला.
काही नकोसा भाग
तासून बाजूला केला;
की दिसायला लागेन,
माझ्या दिव्य रूपात तुम्हाला
आणि मलाही.
हे नकोसे भाग
काढायला, मी सुरवात करतोय
स्वतःवरच घाव घालून.
नको असलेला...
एक एक भाग बाजूला काढतोय.
मला दुखेल..
वेदनेने विव्हळायला होईल..
मी ओरडेनही,
पण त्यानेच मी तळपत जाईन.
जे उरेल ते दिव्य दिसेल.
समाधानाने बहरलेले,
आनंदाचे अस्तित्व असेल.
.
तुष्की नागपुरी
नागपूर, १५ ऑक्टोबर २०१५, २०:३०

गुरुवार, २४ सप्टेंबर, २०१५

सेल्फी

(छायाचित्र सौजन्य: अदिती
.
.
सेल्फी काढताना
तू मोबाईल ला जे जे जवळून निरखू दिलेस
तेच मोबाईल चे डोळे
मला मिळालेत पाहताना.
.
आता...
श्वासांच्या अंतरावर येऊन
तुला बघणे होतेय
सेल्फी मुळे
.
ओढ होती आधी...
सेल्फीमुळे;
वेड लागायला लागले आहे.
आणि इतक्या जवळून पाहताना
अस्तित्व
वितळत चालले आहे
.
कुणाला श्वासाच्या
अंतरावर ओढून
मंद हसणे म्हणजे
वाळलेल्या रानात
ठिणगी लावण्यासारखे आहे
नाही का?

तुष्की नागपुरी
२४ सप्टेंबर २०१५, ०८:००

बुधवार, २३ सप्टेंबर, २०१५

खुणा

(छायाचित्र सौजन्य: यामिनी
.
.
उन्हाचांदण्याची तुझी भूल होते सुखाच्या सरी
पुन्हा मी मरावे पुन्हा जन्म घ्यावे कितीदा तरी

तुझ्या हासण्याने उन्हे गार होती उन्हाळ्यातली
फुलारून रोमांच येतो नवा स्पंदनांच्या वरी

खुले मोकळे केस पाहून जागी किती स्तब्ध मी
नटोनी फुलांनी नशीबात यावे किती भरजरी

तुझा तीळ गोंदून जातो मनाला उभे आडवे
तुझ्या काजळाच्या खुणा कोरल्या काळजाच्या उरी

कितीदा बघावे तरी नाच व्हावे मनासारखे
किती जन्म 'तुष्की' जणू नेत्र माझे रित्या  गागरी

तुष्की नागपुरी
२३ सप्टेंबर २०१५, ०९:००

मंगळवार, २२ सप्टेंबर, २०१५

सावळ काया

(छायाचित्र सौजन्य: सुप्रिया
.
.
सजली घन सावळ काया
मन आतुर रोज बघाया
कसली मन मोहन जादू
हरते, हसताच मला तू

नजरेतुन बाण जिव्हारी
हसण्यातुन रोख दुधारी
घन राजस केस नशीले
मन कातर कातर झाले

नथ नाजुक लोभस छोटी
मधु भावसुधा तव ओठी
कळले घडले हलक्याने
भिजले मन प्रीत धुक्याने

तुष्की नागपुरी
२२ सप्टेंबर २०१५, २१:००

(वृत्त: मेघवितान - लल,गाललगालल,गागा)

सोमवार, २१ सप्टेंबर, २०१५

तू मला मी तुला

(छायाचित्र सौजन्य: दीप्ती
.
.
हास्य ओठांतुनी सांडते केवढे
का गं डोळ्यांमधे दाटलेले झरे?
हास्य वाटे जसे मोहरे केवडा
खोल डोळ्यांमधे खिन्नता का उरे?

साचल्याने कसे व्हायचे सांग तू
वाहुदे शल्य ठेऊ नको बांधुनी
हासणे ना खरे फक्त ओठांवरी
हासणे येऊदे थेट डोळ्यांतुनी

दे तुझे शल्य सारे मला होऊदे
दीप वाटेवरी तू मला मी तुला
वेल झाडास का भार होते कधी?
रोम रोमातुनी हास माझ्या फुला

तुष्की नागपुरी
२१ सप्टेंबर २०१५, १८:३०

सोहळा जाणिवांचा

( छायाचित्र सौजन्य: दीप्ती )
.
.
तुझे शुभ्र लावण्य माझ्या मनाला
सुगंधापरी भारते जीव घेते
तुला आठवोनी असा गुंग होतो
मलाही कळेना कधी भान येते

तुझा सूर्य येताच माझ्या क्षितीजी
पहाटे  परी सोहळा जाणिवांचा
विचारांस झाली तुझी घोर बाधा
मनी मोर वेडा तुझ्या पावसाचा

तुझा छंद आनंद देई असा की
अता कष्ट ते थांबले शोधण्याचे
तुला जाणुनी ध्येय दाटून आले
तुझे नाव जन्मा वरी गोंदण्याचे

तुष्की नागपुरी
२१ सप्टेंबर २०१५, ०८:००

बुधवार, १५ जुलै, २०१५

किल्ला

(छायाचित्र सौजन्य: मनाली )
.
.
किती जहरी तुझं गं हासणं
माझ्याकडं बघुन मगापासनं
आधिच सावळ्या रंगाची भूरळं
त्यात मोकळ्या केसांनी जाचणं

तुला पाहिल्या पासुन बये गं
दुनिया ऑऊटॉ फोकसं झाली
किती छटा मी टिपल्या तरीही
तुझ्या अदेची सर ना आली

रूप तुझे केवढे गनीमी
सांभाळता आले ना स्वतःला
गुंतलो रायगडाची शपथ
तुझा झाला हा हृदयाचा किल्ला

तुष्की नागपुरी
नागपूर, १५ जुलै २०१५, ०८:००

मंगळवार, १४ जुलै, २०१५

रूप बिलोरी

(छायाचित्र सौजन्य: अनुराधा)
.
.
उफ्फ तुझे हे रूप बिलोरी
चित्त पाखरू फसले गं
कुठं जाईना काही खाईना
बावरल्यागत बसले गं

बट माथ्यावर, सळसळणारे
नाग मनाला डसले गं
जीव बघूनच विरघळलेला
भान तयाला कसले गं

नजर रोखूनी तुझे पहाणे
बाण दिलावर धसले गं
तू हसल्यावर घाव बिथरुनी
खोल गोड ठसठसले गं

तुला पाहता नशीब माझे
धुंद होऊनी हसले गं
ओवाळावा जीव मनातून
विचार असले तसले गं

तुष्की नागपुरी
नागपूर, १४ जुलाई २०१५, ०१:००

मंगळवार, ३ मार्च, २०१५

हिरो

(छायाचित्र सौजन्य: निलेश )
.
.
जरा फसले तुझ्या त्या
घनदाट मिशी ला रे
थोडा थोडा हात होता
आपल्या त्या विशी चा रे
.
कसे हसता खेळता
दोन नव्हे एक झालो
तुझ्याशिवाय जगणे
कधी नकोच म्हणालो
.
किती तरी पावसाळे
चाललो आयुष्यवाट
तुझी मिशी पाहिलीकी
आठवते सुरवात
.
तुझी अनेक रूपे मी
पाहिल्या रे किती अदा
तरीही अजून मन
तुझ्या मिशीवर फिदा
.
तुझा पहिला प्रभाव
नव्हे कधी सरायचा
घनदाट मिशीवाला
हिरो तूच आयुष्याचा
.
तुष्की नागपुरी
नागपूर, ०३ मार्च २०१५, ००:००

झुळुक

(छायाचित्र सौजन्य: छाया )
.
.
तू दुर्मिळ नरगिस फूल
निनावी भूल, जगाच्या साठी
तू अनवटशी चाहूल
हवासा पूल, मनाच्या काठी
.
तू सळसळणारे नाग
किती अनुराग, मुक्त केसांचा
तू पहाटभोळी जाग
अनावर राग, धुंद श्वासांचा
.
तू मंद झुळुक आगळी
कळी पाकळी, खुलाया लागे
तू गूढ ओढ सावळी
वेड वादळी, जिवाच्या मागे
.
तुष्की नागपुरी
नागपूर, ०३ मार्च २०१५, ०८:००

मंगळवार, २४ फेब्रुवारी, २०१५

खळी

(छायाचित्र सौजन्य: प्रणाली
.
.
कितेक खळ्या पाहिल्यात पण
तुझी खळीच लाजवाब
बाकी साऱ्या सुंदर तरी
अतुलनीय हिचा रूबाब
.
तुझी खळी काळजाला भूल
तुझी खळी निसरडा कडा
नजर पडताच घसरतोच गं
पाहणारा प्रत्येक बापडा
.
टपोर डोळे अवखळ केस
वेड लावते खेळकर अदा
तू हसताच उमलते खळी
जन्मच सगळा होतो फिदा
.
तुष्की नागपुरी
नागपूर, २४ फेब्रुवारी २०१५, २०:३०

भुरळ

(छायाचित्र सौजन्य: प्रणाली )
.
.
किती कविता लिहिल्या तरी
पुन्हा नवं सुचतं
तुझं असणं रोजचचं तरी
पुन्हा नवं असतं
 .
मला वाटतं कळलीस मला
तरी नव्याने छळतेस
पुन्हा अनोखी अदा होतेस
रोज नव्याने कळतेस
.
कधी केसांची भुरळ घालतेस
खळीची कधी डोळ्यांची
कधी 'स्टुपिड' म्हणून करतेस
मधुर सुरवात दिवसाची
.
कायमचाच गोंदला गेलाय
तुझा विचार मनात
तुझ्या असण्याचा सुगंध भरलाय
माझ्या क्षणा क्षणात
.
तुष्की नागपुरी
नागपूर, २४ फेब्रुवारी २०१५, १०:००

वसंत ऋतू

(छायाचित्र सौजन्य: प्रणाली )
.
.
तू खूप छान दिसतेस
छे छे नाही जमलं
तुझं दिसणं या शब्दात
बांधता येईल कसलं

पार अमर्याद आहे
तुझं दिसणं तुझं असणं
तसा अन्यायच होईल
तुला शब्दात बांधून ठेवणं

तुझी खळी तुझे डोळे
त्यांचे माझ्यावर वार
तू दिसताच हरवून गेलोय
खरंच कुणालाही विचार

जीव वेडा होतो तरी
अशीच हसत रहा तू
माझ्यासाठी कायमचाच
मग असतो वसंत ऋतू

तुष्की नागपुरी
नागपूर, २४ फेब्रुवारी २०१५, ०८:३०

सोमवार, २७ ऑक्टोबर, २०१४

तुझे हसणे

(छायाचित्र सौजन्य: प्रसाद )
.
.
तुझे हसणे सख्या रे, इंद्रधनुष्यासारखे
भरे सातही रंगांनी, माझे आयुष्य हरखे
.
तुझे हसणे निर्मळ, तुझे हसणे आनंद
तुझे हसणे, चोरून, मला पाहण्याचा छंद
.
तुझे हसणे पाहून, क्षण क्षण होई खास
सुखमय होतो मग, दिवसाचा हा प्रवास
.
माझ्या कडे पाहून तू, हसतोस जेव्हा जेव्हा
काळजाचे होते पाणी, तिथे तिथे तेव्हा तेव्हा
.
परिस्थितीचे टोचणे, उन्ह जगाचे जहाल
विसरावे पांघरून, तुझ्या हसण्याची शाल
.
तुझे हसणे भरते, हसू माझ्याही ओठात
दरवळे रोम रोम, दीस सुगंधी होतात
.
आठवत राही सदा, ढब तुझ्या हसण्याची
तुझ्या नजर मिठीत, ऊब हिवाळी उन्हाची
.
तुष्की नागपुरी
नागपूर, २७ ऑक्टोबर २०१४, ०८:३०

बुधवार, १ ऑक्टोबर, २०१४

छाप

(छायाचित्र सौजन्य: पल्लवी )
.
.
सावळा कसा? विचारल्यावर
मी म्हणतो तुझ्या सारखा
भोळा कसा? विचारल्यावर
मी म्हणतो तुझ्या सारखा
.
कुरळे कसे? विचारताच
मी म्हणतो तुझ्या सारखे
हळवे कसे विचारताच
मी म्हणतो तुझ्यासारखे
.
अल्लडपणाच्या व्याख्येतही
मी तुझेच नाव घेतो
वेड लावणाऱ्या लोंकातही
पहिले तुझेच नाव देतो
.
तुला पाहिल्या पासून जगच
तुझ्या पासून सुरू होतयं
सावळ्या रंगाची कुरळ्या केसांची
छाप पाडून जीव घेतय
.
तुष्की नागपुरी
नागपूर, ०१ ऑक्टोबर २०१४, ०८:५०

शनिवार, २७ सप्टेंबर, २०१४

फोन

तुझ्या भेटीचा आनंद
पसरला मनभर
माझ्या सुखाचा प्रकाश
दरवळे घरभर
.
तुझा आवाज ऐकून
मोहरली माझी काया
कान ओंजळ बनले
तुझे शब्द साठवाया
.
आता तासभर तरी
करणार हितगुज
तुला सांगणार सारं
साठलेलं जे कधीचं
.
काळावेळाचे ही भान
आता मला नको बाई
किती वाट पाहुनिया
मग तुझा फोन येई
.
तुष्की नागपुरी
नागपूर, २७ सप्टेंबर २०१४, ०८:००

सोमवार, २२ सप्टेंबर, २०१४

पऱ्यांची परी

(छायाचित्र सौजन्य: पूजा )
.
.
मी तुला म्हणणार गं
तू पऱ्यांची परी
कप्पाळावर हासुनी तु
हात मारला तरी
.
गोड बोलतेस तू
लागतो लळा तुझा
त्यातही कहर असा
रंग सावळा तुझा
.
ती मुजोर बट तुझी
केवढी तिची मजल
हासतेस त्याक्षणी
भासतेस तू गझल
.
~ तुष्की नागपुरी,
नागपूर, २२ सप्टेंबर २०१४, २०:३०

बुधवार, १७ सप्टेंबर, २०१४

व्याख्या

(छायाचित्र सौजन्यः सोनम )
.
लाख लोकांनी जरी कित्येकदा लिहिले तुझ्यावर
तू जशी आहेस त्याची धार ना येई कशावर
.
तू जरी उच्चारले नाही तरी त्याला कळाले
बोलले डोळे तुझे अन ओठ फसले हासल्यावर
.
छान दिसण्याच्या किती व्याख्या जुन्याश्या पाडते तू
एकदा टी शर्ट पिवळा जिन्स डेनिम घातल्यावर
.
मन भरेना पाहण्याने उलट लागे ओढ अजुनी
काळजाचे कोण जाणे काय होइल लाजल्यावर
.
पौर्णिमा होई तुझ्या अल्लड पणाने पाहण्याने
मुग्ध होती गात्र सारे त्या सुखाच्या चांदण्यावर
.
तुष्की नागपुरी
नागपूर, १७ सप्टेंबर २०१४, १०:००

मंगळवार, १६ सप्टेंबर, २०१४

हट्टी

(छायाचित्र सौजन्य: सोनम
.
.
झुळकेसारखे मुलींचे चेहरे
समोरून येतात विरून जातात
पण तुझा चेहरा फारच हट्टी आहे
मनात असा काही जाऊन चिकटलाय
तो मनातून जातच नाहीये
सावळा रंग इतका केमिकल लोचा
करू शकतो हे वाटलेच नव्हते
आणि त्वावर उठून दिसणारी तुझी नथ
माझ्या काळजावर ओरखडे पाडतेय गं
हसतेस काय?
.
हो पण तुझ्या हसण्यानेच
मिटताहेत किती तरी
सुनसान क्षणांचे, एकट्या रात्रींचे दंश
तुझ्या हसण्याच्या प्रकाशाने
भरतोय माझा गाभारा
जग बदलणारा, कमाल आहे
लाघवी तुझा चेहरा
तुझं असं समोर येणं
मी योगायोग कसा मानू?
तू होऊन आली आहेस
आनंदाची, आशेची खूण जणू
.
तुष्की नागपुरी
नागपूर, १६ सप्टेंबर २०१४, ११:००

शनिवार, २१ जून, २०१४

मराठमोळे

(छायाचित्र सौजन्य: यामिनी )
.
.
मराठमोळे तुझे सावळे रूप किती जरतारी
दागिन्यास येतेय तुझ्या त्या हसण्यानेच उभारी
.
ओठ पाकळ्या तांबुस गालांवर हा खळीचा भास
केसांचे हे झुळझुळ रेशिम पसरे मंद सुवास
तुला पाहता भक्त विठूचा विसरून गेला वारी
दागिन्यास येतेय तुझ्या त्या हसण्यानेच उभारी
.
टपोर डोळे पाहून त्यांना हृदयी जादू होता
किती कवींनी केल्या असतील कविता येता जाता
तुला पाहण्या चंद्र सूर्य पण येती तुझिया दारी
दागिन्यास येतेय तुझ्या त्या हसण्यानेच उभारी
.
~ तुष्की,
नागपूर, २१ जून २०१४, २१:००

शुक्रवार, २० जून, २०१४

यामिनी

(छायाचित्र सौजन्यः यामिनी )
.
.
ही यामिनी
ही खूप छान लिहिते
कधी हळव्या तर कधी कणखर शब्दात
वास्तवाचे भान लिहिते
.
ही कविता म्हणते ना
तो असतो भावनांचा सण
जी ऐकतोय ती पण असते कविता
आणि जी पाहतोय ती पण
.
संवेदनशील इतकी
की देवालाही विचारते जाब
वाचता वाचता काटा आणतो
असा हिच्या मुक्त शब्दांचा रूबाब
.
ही टिपते आसपासचे कारूण्य
मांडत राहते मार्मिक शब्दात
कधी विरहात आर्त होते
तर कधी घणाघाती वज्राघात
.
हिची गरूडभरारी पाहून
अचंभित होतात जेष्ठ श्रेष्ठ कवी
इतकं वळणदार लिहिते की
हिची कवितांची वही बघायलाच हवी
.
~ तुष्की
नागपूर, २० जून २०१४, २१:३०

आयुष्य घडवणाऱ्या मुली

(छायाचित्र सौजन्यः यामिनी )
.
.
हे जे शब्द आहेत ना
फसवे आहेत गं
कोणत्यातरी सिनेमात
कोणत्यातरी नाटकात कादंबरीत
वाचलेल्याच डायलाग मधून
काहीतरी मी बोलत असेन
पण आज एक मनापासून सांगतो
कोणतेही शब्द वापरले ना
तरीही त्यातून व्यक्त होणारे
आज माझे हृदय आहे
मनात तीव्रतेने येते आहे की
आज तुला मनापासून, काही सांगायचे आहे
.
मी आधीही जगतच असेन गं
पण तुला पाहिले ना...
त्या क्षणापासून माझे, खरे जगणे सुरू झाले
सगळं काही तेच तर दिलेय तुला त्याने
अनेक मुलींना दिलेय तसेच
एक गोजिरे नाक
बोलके डोळे
रेशिम केस, मोत्यांसारखे दात
अलवार ओठ
सुडौल बांधा, पण हे सगळे
एकत्र जोडताना त्याने तुझ्यात
जी कमाल टाकलीये ती
त्यालाही पुन्हा कधीच म्हणजे कधीच
जमलेली नाही
तुझ्या बघण्यात तुझ्या असण्यात
जी विलक्षण ओढ आहे
विलक्षण लावण्य आहे
ते पुन्हा तो कुठेच टाकू शकलेला नाही
.
मला वाटायचे मी कोणत्यातरी
मुलीचे हृदय नक्कीच जिंकणार
माझ्यामागे माझे प्रेम पाहून
कोणी तरी नक्की बेहद्द फिदा होणार
पण एका धन्य दिवशी माझ्या जगण्यात
तू आलीस....!
आता मला ..
जगाकडून कोणत्याच अपेक्षा, राहीलेल्या नाहीत !
.
तू असल्याने
तुझ्या दिसण्याने जे मिळालेय
ते इतके आहे
की आता मला तुझ्याकडूनही काही नको
मी नास्तिक होतो गं
पण त्याने तुला घडवून
जे काही दिलेय ना
त्याने मी भक्त झालो आणि
असा भक्त ज्याला काही
मागायचीच गरज उरलेली नाही
मला जे मिळायचं
ते भरभरून मिळालं
आता तुझ्यावर प्रेम करणं
हे श्वास घेणच झालंय
आणि आनंद इतका गहन आहे
की हा आयुष्यभर पुरणार आहे
.
तुझ्या डोळ्यात मला जे दिसलंय ना
ते स्वप्न मीच आहे याची
मला खात्री आहे
तुला कळेल तेव्हा तू धावत येशील
तोपर्यंत इथूनच तुझाच
.
मी
.
~ तुष्की
नागपूर, १९ जून २०१४, २३:३०

बुधवार, १८ जून, २०१४

इतकी सुंदर

(छायाचित्र सौजन्य: यामिनी
.
.
तू इतकी सुंदर आहेस
चंद्र तुला पहायला थांबत असेल
हिला इतके सुंदर का केले
देवाजवळ गाऱ्हाणे सांगत असेल
.
तू इतकी सुंदर आहेस
की पाहणारा कवी होत असेल
तुझ्या प्रत्येक अदेला टिपण्यासाठी
क्षणाक्षणाला कविता लिहित असेल
.
तू इतकी सुंदर आहेस
प्रत्येक तरूण तुझ्या हृदयात
राहायची स्वप्ने पाहत असणार
आणि लग्न झालेले
सगळे सतत हळहळत असणार
.
तू इतकी सुंदर आहेस
सर्व मुलींना वाटत असेल
अन्याय झाला
इतकं नखशिखांत सौंदर्य
हिलाच कशाला?
.
तू इतकी सुंदर आहेस
की मीच हळवा  होतोय
तू सतत आनंदी रहावेस
म्हणून प्रार्थना गातोय
.
तू इतकी सुंदर आहेस
की मला थांबताच येत नाहीये
कितीही लिहिले तरी वाटते
शब्दात मांडताच येत नाहीये
.
तुष्की
नागपूर, १८ जून २०१४, ०८:३०

मंगळवार, १७ जून, २०१४

ऋण

(छायाचित्र सौजन्य: यामिनी
.
.
चकवा काय असतो
हे तुला बघून कळावं
आणि झपाटणं काय असतं
हे मला बघून
.
तुझ्या काजळ भरल्या
सागर गहिऱ्या डोळ्यांचा वार
मी कसा झेलू कळे पर्यंत
तू असं काही गोड हसावंस
की माझ्या अस्तित्वातले सगळे
अणू रेणू एकाचवेळेस रोमांचावेत
.
आणि
हे असे मोकळे केस सोडतात का?
आजुबाजूचे सगळे जग
झपाटल्या जातेय
वे डे होतेय याची तुला काही कल्पनाच
नाही ना?
.
ती तुझी नाजुकशी
कपाळावरची काळी बिंदी
तिच्या मुळे होणारी माझ्या
हृदयाची जलद गती...
.
कसे घडवले असेल त्याने
हे अप्रतीम शिल्प?
तुला पाहून त्याने स्वतःलाच टाळी दिली असेल का?
नाचला असेल आनंदाने
.
शब्दच नाहीत गं
तुझं वर्णन करायला
हे विलक्षण लावण्य पाहण्याला
त्याने मला डोळे दिलेत
या एका कारणासाठी
मी त्याचा आजन्म ऋणी आहे
.
~ तुष्की
नागपूर, १७ जून २०१४, २२:३०

सोमवार, १६ जून, २०१४

श्वास वेडे

(छायाचित्र सौजन्य: यामिनी
.
.
का पाहता तुला मी, विसरून भान जातो
होतात श्वास वेडे, थांबून काळ जातो
.
कानात तारकांचे, तू डूल घातलेले
गालावरी मधाचे, साठेच ओतलेले
डोळ्यात भाव गहिरा, घेऊन खोल जातो
होतात श्वास वेडे, थांबून काळ जातो
.
रंगात सावळ्या या, जादू किती असावी
पाहून काळजाची शल्ये ही दूर व्हावी
वेधून काजळाचा कमनीय बाण जातो
होतात श्वास वेडे, थांबून काळ जातो
.
ओठात अमृताचे, दिसती हजार साठे
केसात गंध घ्याया, वारा अधीर वाटे
प्रत्येक श्वास तुझिया, स्मरणात खास जातो
होतात श्वास वेडे, थांबून काळ जातो
.
~ तुष्की
नागपूर, १६ जून २०१४, १०:००

रविवार, १५ जून, २०१४

वेडाबाई

(छायाचित्र सौजन्य: भावेश )
.
.
तुला आठवण्याची
तशी काही गरज नव्हतीच
शाळेपासून एकत्र खेळलेलो आपण
पण..
काल तुला फ्रेंडशीप बॅण्ड घातला ना
तेव्हा पासून सगळेच बदललेय
.
तुझे प्रसन्न हसणे माझ्या
मनातून काही जातच नाहीये
मी तर सगळेच तुला सांगते
हे कसं सांगू
की तुला पाहून आजकाल
धडधड वाढते आणि गाल लाल होतात
.
तू एकदा म्हणालास ना
की काय वेडाबाई
एखादा बायफ्रेंड बनवला की काय?
तो कसा बनवतात
मला माहित नाही बाई
पण आजकाल नावासमोर
तुझे नाव लिहून पाहावेसे वाटते
.
तुझ्या केसातून
एकदातरी हात फिरवायची
इच्छा होतेच आजकाल
आणि तू पण असा आहेस ना
माझ्या डोळ्यातली चमक
बदललेले बघणे तुला कळत नाही का रे?
.
~ तुष्की
नागपूर, १५ जुलाई २०१४, २३:३०

शनिवार, १४ जून, २०१४

ओढ

(छायाचित्र सौजन्य: यामिनी )
.
.
पाकळी खुलाया लागली
आगळी ओढ ही लागली
मी स्वतःच्याच प्रेमामध्ये नाचते गं
चपळ मन उडते गं,
धरले तरी पळते पळते गं

रोज फुलांनी सजते आणिक
काजळ लावते अपुल्या तालात गं
तारूण्याच्या वेशीवरती
पसरते लाली हसता गालात गं
मी मस्त मयुरी होते
पाऊस होऊनी ये तू
तुझी वाट व्याकुळतेने पाहते गं
चपळ मन उडते गं,
धरले तरी पळते पळते गं

शब्दांच्या पंखावर बसुनी
माझी भरारी कवितांच्या गावी
मुक्तछंद मोहतो मनाला
भाव मनातले गुंफाया लावी
मोकळे व्यक्त मी होते
ऐकाया येशील ना तू
आता कवितांच्या गावामध्ये राहते गं
चपळ मन उडते गं,
धरले तरी पळते पळते गं

खुणावते हे जीवन मजला
स्वप्नांची किती शिखरे गाठायची
कुणास ठाऊक कधी कुणावर
जीव जडायचा हृदये भेटायची
मी सरिता खळखळणारी
तू सागर माझा हो ना
मन मीलनाचा गोड क्षण मागते गं
चपळ मन उडते गं,
धरले तरी पळते पळते गं

~ तुष्की
नागपूर, १४ जून २०१४, ०९:३०

गुरुवार, १२ जून, २०१४

तुझ्यात काहीतरी आहे..

(छायाचित्र सौजन्य: यामिनी )
.
.
तुझ्यात काहीतरी आहे
जे सांगताच येत नाही
पण हृदयाची धडधड माझी
सर्वांना ऐकू येई
.
तुझ्यात काहीतरी आहे
डोळ्यात खोल दडलेले
कितीतरी स्वप्नांचे पक्षी
उडण्यासाठी अडलेले
.
तुझ्यात काहीतरी आहे
जे माझे गणित चुकवते
आधीचे सुंदर दिसण्याचे
सगळे ठोकताळे हुकवते
.
तुझ्यात काहीतरी आहे
ज्यामुळे मीच बदलतोय
तुझ्या नजरेत येण्यासाठी
माझा अणू रेणू उसळतोय
.
तुझ्यात काहीतरी आहे
जे फक्त बघत रहावं
या जग विसरण्याच्या
अनुभूतीतच जगणं व्हावं
.
तुझ्यात काहीतरी आहे
जे कुणाजवळच नाही
सावळ्या रंगाच्या जादूने
जणू नटलेली काया ही
.
तुझ्यात काहीतरी आहे
जीव ओवाळावा असं
कृष्णाच्या बसरीने गोकूळ
मुग्ध व्हायचे अगदी तसं
.
तुझ्यात काहीतरी आहे
जे दिशांना प्रभावित करतं
किती क्षणांच्या सोहळ्याचं
मोहरण्याचं कारण ठरतं
.
~ तुष्की,
नागपूर, १२ जून २०१४, २३:००

शुक्रवार, ६ जून, २०१४

पाऊस तुझा

(छायाचित्र सौजन्य: नेहा
.
.
मस्त मोकळे, जगा वेगळे, तुझे हासणे
मन मोहते, वेड लावते, रूप देखणे
.
आवडणारा, तांबुस जरा, रंग सावळा
केस मोगरा, गोड चेहरा, भाव सोवळा
.
पाहता क्षणी, आपच मनी, दाद निघाली
झळ उन्हाची, गार वार्‍याची, झुळुक झाली
.
तुझे असणे, करी जगणे, ताजे तवाने
सुख भरते, चिंब करते, तुझे चांदणे
.
नाही नटणे, तरी दिसणे, जणू अप्सरा
पाऊस तुझा, जन्मच माझा, मोर नाचरा
.
नकोच गडे, कुणाच कडे, आता बघणे
आठव तुझे, विचार तुझे, झाले जगणे
.
~ तुष्की,
नागपूर, ०६ जून २०१४, १७:३०

बुधवार, ४ जून, २०१४

योग

(छायाचित्र सौजन्य: नेहा )
.
.
ऐकताना मुग्ध व्हावी धन्य व्हावी स्पंदने
पाहताना अन् फिटावे डोळियांचे पारणे
छेडता तू तार हरते देह आणिक भान ही
अटळ आता नादवेडे चित्त माझे गुंतणे
.
चेहरा आरक्त हाती शोभते गीतार ती
साधती संगीत दोन्ही हात तन्मय नादती
केस करती नृत्य वाऱ्यावर मनावर राज्य ही
वेड लावी ही अदा धडधड जलद व्हावी किती
.
कोरसी हृदयात झंकारून तारा गीत तू
ऐकता अमृत स्वरांचे बदलतो माझा ऋतू
श्वास धरतो ताल आणिक वेदना होते तरल
नादमय हा जन्म होतो मानसी उरतेस तू
.
गोड हा संभ्रम किती मी ऐकू की पाहू जरा
ना घडे हा योग नेहमी दुग्ध आणिक शर्करा
.
~ तुष्की
नागपूर, ०४ जून २०१४, २०:३०

गुरुवार, २९ मे, २०१४

तूच सांग

(छायाचित्र सौजन्य: प्रसन्न )
.
.
प्रत्येकाची चांगली बाजू शोधून काढतोस
खुसखुशित शब्दात सर्वांसमोर मांडतोस
समजून घेतोस न लिहिलेल्याही भावना
उत्साहाची बरसात करून देतोस चालना
दाद देण्याची संधी तुझ्याने हुकणार नाही
सांग तुझ्यावर प्रेम कसे जडणार नाही?
.
आवर्जून वाचतोस तू सर्वांच्या कविता
भरभरून लिहितोही त्यावर येता जाता
लिहितोस छान सहज मनातून आलेले
टिपतोस कवितेतले मोती विखूरलेले
कविता तुझ्या अभिप्रायांची वाट पाही
सांग तुझ्यावर प्रेम कसे जडणार नाही?
.
मनापासून दाद देतोस शब्दरूपाला
टिंगल करून कधी हसून घेतोस स्वतःला
सर्वांच्या मनाचा तू करतोस सांभाळ
स्तुतीमध्ये मुक्तहस्ते वाटतोस आभाळ
तुझ्याइतका रसिक कुणीच असणार नाही
सांग तुझ्यावर प्रेम कसे जडणार नाही?
.
मस्त रांगडा चेहरा तुझा हसतोस गोड
त्यावर नम्रतेची शालीनतेची जोड
कवितांना तू अर्थ देतोस नभा एवढा
तुझ्यासारखा तूच असावास मनकवडा
नम्रतातर तुला बघूनही शिकता येई
सांग तुझ्यावर प्रेम कसे जडणार नाही?
.
~ तुष्की
नागपूर, २९ मे २०१४, २३:००

नशा

(छायाचित्र सौजन्य: पूजा )
.
.
कळेना कुणाची नशा जास्त आहे
तुझी की सुरेची नशा जास्त आहे?

किती सावळे रंग पाहून झाले
तुझ्या सावळ्याची नशा जास्त आहे

तुला वाचणे भान हरपून जाणे
तरी ऐकण्याची नशा जास्त आहे

तुला पाहणे सोहळा जाणीवांचा
तुझ्या पाहण्याची नशा जास्त आहे

तुझा चंद्र व्यापून जातो जीवाला
तुझ्या चांदण्याची नशा जास्त आहे

तुझे बोलणे बोलणे अमृताचे
तुझ्या हासण्याची नशा जास्त आहे

तुझे धीट होणे हवेसे हवेसे
तुझ्या लाजण्याची नशा जास्त आहे

फसे मोगरा केस तू सोडताना
तुझ्या मोगऱ्याची नशा जास्त आहे

तुझ्या आठवांनी जरी चिंब 'तुष्की'
तुला भेटण्याची नशा जास्त आहे

~ तुष्की
नागपूर, २९ मे २०१४, १३:००

मंगळवार, २९ एप्रिल, २०१४

प्रेरणा

(छायाचित्र सौजन्य: ज्योती )
.
.
शब्द अपुरे पडती रूप
तुझे सांगताना
अजूनही विश्वास बसेना
तुला पाहताना
तू गोड इतकी कशी
तू कोण कुठल्या जगाची
तू मंद हासताना
धडधड वाढे हृदयाची
मला येते आहे मजा
जगण्याची

बघणे तुझे दिसणे तुझे
किती बोलके डोळे तुझे
पाहुन मन भरतेच ना
मन मागते असणे तुझे
हे स्वप्न की खरे शोधू कसे
मन नाचते कुणा सांगू कसे
हे भाग्य माझे जणु
ठेव जिवाची
साक्षात देवता तू
सौंदर्याची
मला येते आहे मजा
जगण्याची

तू वेगळी चाफेकळी
थोडीशी तू आहे खुळी
स्मरता तुला छळते मला
गालातली अल्लड खळी
तू आयुष्याची आशा नवी
तुला पाहताच मी झालो कवी
तू ओढ उत्कट किती
वेड्या मनाची
तू प्रेरणा माझ्या नव्या
कवितेची
मला येते आहे मजा
जगण्याची

 ~ तुष्की
नागपूर, २९ एप्रिल २०१४, ०८:३०

गुरुवार, २४ एप्रिल, २०१४

सुंदर

(छायाचित्र सौजन्य: सुनिता )
.
.
जितके मोहक आणि तुझे ते दिसणे सुंदर
त्याहुनही आहेस जशी ते असणे सुंदर.
.
कवितांनाही अद्वितीय येतोय सुंगंध
शब्दाशब्दातून तुझे ते ठसणे सुंदर
.
विचार देती तुझे मनाला दंश विलक्षण
तरी हवेसे किती अहा हे डसणे सुंदर
.
फसशिल सांभाळून म्हणाले लोक कितीदा
इतके झाले कधीच नव्हते फसणे सुंदर
.
'तुष्की' हसतो किती गोड म्हणतात मला ते
तुला आठवुन दिसते माझे हसणे सुंदर
.
 ~ तुष्की
वाशींग्टन, २४ एप्रिल २०१४, ०७:००

पुन्हा पुन्हा मी

(छायाचित्र सौजन्य: ज्योती
.
.
तुझ्या रुपाला स्मरत राहतो पुन्हा पुन्हा मी
जगत राहतो मरत राहतो पुन्हा पुन्हा मी

बाल्कनीत तू दिवसातुन एकदा दिसावी
येणे जाणे करत राहतो पुन्हा पुन्हा मी

कसे सावरू घोर तुझा हा रूपचंद्रमा
चकोर वेडा ठरत राहतो पुन्हा पुन्हा मी

तुला मिळावी ऐसपैस बसण्याला जागा
हृदयाला आवरत राहतो पुन्हा पुन्हा मी

ओझरती तू दिसता होई धांदल 'तुष्की'
नयन घागरी भरत राहतो पुन्हा पुन्हा मी

 ~ तुष्की
वाशींग्टन, २४ एप्रिल २०१४, २१:००

शनिवार, १२ एप्रिल, २०१४

कायमची...

(छायाचित्र सौजन्य: मयुरी
.
.
तू दिसलीस
थांबली हृदयाची वणवण
तू हसलीस
आणि संपले एकटेपण

आभाळाहूनही
अफाट तू सावळी माया
जीव अनावर
दिसली नाहीस की बघाया

बोलतेस तेव्हा
अमृताचा पाऊस कानावर
नुसतंच बघतेस
आणि धुंद रोमांच अंगावर

आयुष्याला
अर्थ गहन देशील का
सांग कायमची
तू माझी होशील का?

 ~ तुष्की
वर्नान हिल्स, १२ एप्रिल २०१४, ०७:३०

मराठमोळी

(छायाचित्र सौजन्य: दक्षता )
.
.
तू
इतकं सुंदर
असायला नको होतंस
किमान
माझ्या नजरेत तरी
ठसायला नको होतंस

तुझ्या असण्याने
माझी सगळी गणितच बदलतात
तुझ्यापासून
सुरू होतात विचार
तुझ्याच कडे परत येऊन बसतात
तू
मला पाहून
हसायला नको होतंस
तू
इतकं सुंदर
असायला नको होतंस

तुझ्या कडे पाहून
जग किती सुंदर ते कळतं
तुझ्या असण्यानेच
गड जिंकण्याचं तानाजीबळ मिळतं
तू
इतकं मराठमोळं
दिसायला नको होतंस
तू
इतकं सुंदर
असायला नको होतंस

 ~ तुष्की
वर्नान हिल्स, १२ एप्रिल २०१४, २०:००

बुधवार, ९ एप्रिल, २०१४

तुझा चेहरा

(छायाचित्र सौजन्य: चैताली
.
.
संध्याकाळ जेव्हा दाटून येते
झुळझुळ वारे जाणवून देते, तुझी कमतरता
तेव्हा तुझा चेहरा आठवतो मी
मंद हसणारा
जगातल्या प्रत्येक चेहऱ्याहून
अधिक सुंदर दिसणारा
कुशल कलाकाराने
मोहक चैतन्य घेऊन
मन लावून एक एक रेष कोरावा तसा
मनमोहक चेहरा
वेड लावणारा
जगातले सगळे शल्य विसरायला लावणारा
आणि गालात हसतो
स्वतःच्या डोक्यावर स्वतःच टपली देतो
हसता हसता
रोजच संध्याकाळी
संध्याकाळ जेव्हा दाटून येते

इतर वेळा
जेव्हा वैतागुन आफिसबाहेर
सिगारेट प्यायला येतो ना
तुझे सागरडोळे स्मरतात
जसे काही तू डोळ्यांनीच
प्रेमपूर्वक हलकेच चेहरा हलवून
नाही म्हणते आहेस
मला बरेचदा त्यांचे म्हणणे मोडवत नाही
सिगारेट न पिताच मी माघारी फिरतो
कदाचित सिगारेट पिण्याला बाहेर येणे
हे तुझ्या डोळ्यांचे
स्मरण पुन्हा व्हावे म्हणूनच होत असावे

अनेक क्षण असे येतात
अचानक मला भासते
तुझ्या ओठपाकळ्यांतून
तू जेव्हा 'राजू' म्हटले होतेस
तेच रोमांच
ते तेव्हाचे ओठ आणि ते ऐकू आलेले 'राजू'
हृदयाच्या आत
कोरल्या गेले होते
तेव्हापासून त्याची धडधडगतीच बदललेली

तुझ्या घनदाट रेशमी केसांच्या
मागून वळसा घेत
माझ्यापर्यंत जे वारे पोहचते
त्याचा सुगंध
श्वासा श्वासात भिनतो आणि अस्तित्वाची
कळी फूल होते
त्याच वेळेस मी साठवून ठेवतो
त्यांची स्मरणे, ती सतत
माझ्या भावनासागराला भरती आणतात
आणि मनाचे सर्व किनारे
भिजवत असतात, अचानक
फोनवर नाही भागत गं
पुन्हा राजू म्हणताना तुझ्या ओठपाकळ्यांना
पाहण्यात जो सोहळा आहे
तो डोळ्यांनीच जगायला पाहिजे
हो ना.

 ~ तुष्की
नागपूर, ०९ एप्रिल २०१४, ०४:००
वर्नान हिल्स

मंगळवार, ८ एप्रिल, २०१४

कस्तुरी

(छायाचित्र सौजन्य: मोनिका)
.
.
तू म्हणतेस
तुझा चेहरा खूपच साधा
मग मला सांग
मला का झालीय त्याची बाधा?

मला का तुझ्या डोळ्यात
दिसतो समुद्र
आणि
तुझ्या तांबुस गालावरच्या
तिळाकडे बघण्यात
माझे हरवते भान?
जरी तू म्हणतेस की
तुझं दिसणं म्हणजे ध्यान

तुझे रेशमी केस
आणि नाजुक ओठांना
आठवल्या शिवाय
माझा दिवस ढळत नाही
आता मला कळतंय
की कस्तुरीला तिचं
स्वतःच मोल कसं कळत नाही

~ तुष्की
नागपूर, ०८ एप्रिल २०१४, ०१:४०
वर्नान हिल्स