शुक्रवार, ३१ मे, २०१३

अदा

(छायाचित्र सौजन्य: सारिका )
.
.
अदा अदा म्हणतात ती ही आहे
की काहीच करायचं नाही आणि पाहणारा ठार
तुझ्या हसण्यातून सावरत नाही तर
तुझ्या सावळ्या रंगाचा वार नाजुक वळणांचा वार

मानेवरून वळणारे केस आणि
बोलक्या डोळ्यांचा छेद हृदयाच्या आर पार
तुला पाहणे थांबवून जाणे महाकठीण,
मन नाहीच अगदी नाहीच तयार

तुला सांगणारच नव्हतो मी
मनात राहू द्यावे पण डोळेच चोंबडे फार
कधी काळ थांबला कळलेच नाही
झिणझिणतेय सतत नादतेय मनाची सतार

~ तुष्की
नागपूर, ३१ मे २०१३, २२:३०

मंगळवार, ७ मे, २०१३

स्वप्न

(छायाचित्र सौजन्य: बागेश्री )
.
.
मी म्हणायचो
तुझ्या डोळ्यात मला एक टप्पोरं स्वप्न दिसतं.
तू म्हणायचीस छे
तुला तर कशातही काव्यच सुचतं.

मी म्हणायचो
बघ मनापासून केलेली इच्छा ही प्रार्थना असते
तू म्हणायचीस कशी रे
चिमुरडीतही तुला झाशीची राणीच दिसते

मी म्हणायचो
ती हसायची आणि गुणगुणायची आपल्याच नादात गाणी
आज यशाचे
मेडल घेऊन आली आणि डोळ्यात माझ्या आनंदाचे पाणी

~ तुष्की
नागपूर, ०७ मे २०१३, ००:००