अनुबंध

(छायाचित्र सौजन्य: प्रणाली )

.

.

मनाच्या कानाकोपऱ्यात
दरवळणारा सुगंध तू
सावळ्या रूपाचा हृदयाशी
घडलेला अनुबंध तू
.
आखीव रेखीव कोरलेला
सौंदर्याचा प्रबंध तू
उत्कट ओढीचा काव्यमय 
ओघवता मुक्तछंद तू
.
आशेच्या सुमनांतुन द्रवलेला
मधुर मकरंद तू
जगण्याचे भान विसरून
उरलेला आनंद तू
.
तुष्की नागपुरी
बिलासपुर-नागपुर प्रवास, १२ मे २०१७, २२:३०

खळी

(छायाचित्र सौजन्य: प्रणाली ) 

.

.

कितेक खळ्या पाहिल्यात पण
तुझी खळीच लाजवाब
बाकी साऱ्या सुंदर तरी
अतुलनीय हिचा रूबाब
.
तुझी खळी काळजाला भूल
तुझी खळी निसरडा कडा
नजर पडताच घसरतोच गं
पाहणारा प्रत्येक बापडा
.
टपोर डोळे अवखळ केस
वेड लावते खेळकर अदा
तू हसताच उमलते खळी
जन्मच सगळा होतो फिदा
.
तुष्की नागपुरी
नागपूर, २४ फेब्रुवारी २०१५, २०:३०

भुरळ

(छायाचित्र सौजन्य: प्रणाली )

.

.

किती कविता लिहिल्या तरी
पुन्हा नवं सुचतं
तुझं असणं रोजचचं तरी
पुन्हा नवं असतं
 .
मला वाटतं कळलीस मला
तरी नव्याने छळतेस
पुन्हा अनोखी अदा होतेस
रोज नव्याने कळतेस
.
कधी केसांची भुरळ घालतेस
खळीची कधी डोळ्यांची
कधी 'स्टुपिड' म्हणून करतेस
मधुर सुरवात दिवसाची
.
कायमचाच गोंदला गेलाय
तुझा विचार मनात
तुझ्या असण्याचा सुगंध भरलाय
माझ्या क्षणा क्षणात
.
तुष्की नागपुरी
नागपूर, २४ फेब्रुवारी २०१५, १०:००

वसंत ऋतू

(छायाचित्र सौजन्य: प्रणाली )

.

.

तू खूप छान दिसतेस
छे छे नाही जमलं
तुझं दिसणं या शब्दात
बांधता येईल कसलं

पार अमर्याद आहे
तुझं दिसणं तुझं असणं
तसा अन्यायच होईल
तुला शब्दात बांधून ठेवणं

तुझी खळी तुझे डोळे
त्यांचे माझ्यावर वार
तू दिसताच हरवून गेलोय
खरंच कुणालाही विचार

जीव वेडा होतो तरी
अशीच हसत रहा तू
माझ्यासाठी कायमचाच
मग असतो वसंत ऋतू

तुष्की नागपुरी
नागपूर, २४ फेब्रुवारी २०१५, ०८:३०