शनिवार, २९ डिसेंबर, २०१२

बिचारा भोळा

(छायाचित्र सौजन्य: श्वेता )
.
.
ती अशी मला बघते की, हृदयाची धडधड वाढे
मन सगळे विसरून म्हणते त्या रम्य स्मृतींचे पाढे
हनुवटी तोलुनी हाती, रोखुन बघण्याचा तोरा
रक्तातून वाढत जातो मग रोमांचाचा पारा

सावळी, गोड ती दिसते, गहिरे टप्पोरे डोळे
ओठांत मंद हसण्याचे, चित्तचोर ते चाळे
केसांची हट्टी बट ती गालावर खेळत फिरते
मज काळाची वेळाची कसलीही शुद्ध न उरते

ती छळते तरीही कळते ते वार मधाहुन गोड
मरताना होई हवीशी या मरण्याचीही ओढ
चेहऱ्यावर मराठमोळे सौंदर्यच अवघे गोळा
भुलणार कसा मग नाही जीव बिचारा भोळा

~ तुष्की
नागपूर, २९ डिसेंबर २०१२, १५:००

शुक्रवार, २८ डिसेंबर, २०१२

जाणीव

(छायाचित्र सौजन्य: रिधिमा )
.
.
ती हसते जेव्हा मंद
पाहते धुंद
मोहूनी जाते
मज ओवाळावा जीव
अशी जाणीव
सारखी होते

ती शुभ्र मण्यांची माळ
करी घायाळ
जन्म बावरला
दाटली ओढ केसात
मनाच्या आत
गंध मोहरला

गोडवा कसा गालात
जणू स्वप्नात
अप्सरा येते
हृदयात उडे काहूर
मनाला घोर
लावूनी जाते

~ तुष्की
नागपूर, २८ डिसेंबर २०१२, १०:३०

सोमवार, २४ डिसेंबर, २०१२

स्वप्नातली परी

(छायाचित्र सौजन्य: निकिता (कल्याणी) )
.
.
तुला खोटे वाटत असले तरी
मी तुला उगाच नाही म्हणत, स्वप्नातली परी

तू पाणीदार डोळ्यांनी जेव्हा
माझ्याकडे बघतेस, किंचित ओठात, हसतेस तेव्हा

मला माझाच हेवा वाटतो
मंद सुगंधाचा जणू दरवळ, मनात साठतो

इतकं अनुपम सौंदर्य आपण
प्रत्यक्ष अनुभवतोय खरोखर, जगतोय हे क्षण

विश्वास ठेवण्यासाठी एकदाच
चिमटा काढून बघावा वाटते, स्वतः स्वतःलाच

मग तू सूर छेडतेस हळूवार
किबोर्ड वर, अलगद पण तेव्हा, हृदयात होतात वार

हळवी झालीस की जग विसरतेस
कितीतरी वेळ आपल्याच नादात, बोलत बसतेस

तुला बघतच रहावसं वाटतं
अनेक दिवस आनंद वाटेल असं, सुख मनात साठतं

तुला खोटे वाटत असले तरी
मी तुला उगाच नाही म्हणत, स्वप्नातली परी

~ तुष्की
नागपूर, २४ डिसेंबर २०१२, ०६:००

शनिवार, १५ डिसेंबर, २०१२

सावळी आहे

(छायाचित्र सौजन्य: प्रतिज्ञा)
.
.
मंद हसते, गोड दिसते, सावळी आहे
स्वप्न बघते, सत्य जगते, ती खुळी आहे

कंच हिरवा, रंग खुलतो, शोभतो अंगा
संथ निर्मळ, सौंदर्याची, ही जणू गंगा
त्यात किमया, काय गालावर खळी आहे
मंद हसते, गोड दिसते, सावळी आहे

चंद्र टिकली, मुग्ध करते, साधिशी छोटी
पाहतो जो, मात्र अडतो, डोळिया काठी
लाजली पाहून तिजला हर कळी आहे
मंद हसते, गोड दिसते, सावळी आहे

तुषार जोशी, नागपूर
हैद्राबाद नागपूर प्रवास, २१:४०
.

सावळ्या रंगाच्या पोरी

(छायाचित्र सौजन्य: अपेक्षा )
.
.
सावळ्या रंगाच्या पोरी
तुझे हसणे जहर
नसानसात भरते
गुंगती माझे प्रहर

सावळ्या रंगाच्या पोरी
तुझ्या डोळ्यात चकवा
कुणी उदास दिसता
तुझा फोटो दाखवावा

सावळ्या रंगाच्या पोरी
तुझा चेहरा लाघवी
तुला पाहता पाहता
किती लोक झाले कवी

सावळ्या रंगाच्या पोरी
तुझे केस घनछाया
फुले मोहरून येती
तुझ्या केसात सजाया

सावळ्या रंगाच्या पोरी
तुझ्या सौदर्याचा डंख
अस्तित्वास लावी माझ्या
आनंदाचे किती पंख

(सावळ्या मुलीची गाणी / तुष्की, नागपूर)
+९१ ९८२२२ २०३६५

रविवार, १५ जुलै, २०१२

तू परी स्वप्नांची

(छायाचित्र सौजन्य: स्तुती )
.
.
डोळे ते टप्पोरे
भुवयांचे कंगोरे
लाघवी लाघवी पाहणे
नथनीचे झगमगणे
केसांचे भिरभिरणे
गंधीत झाले गं जगणे
स्वप्नांची तू परी
तू परी स्वप्नांची

दातांचे जणु मोती
आतुरले दव ओठी
भाषा ही नजरेची
सगळे ओळखण्याची
केसांचे मानेवर
ते वळसे जीवघेणे
किरणांचे गालांवर
लोचटसे बागडणे

डोळे ते टप्पोरे
भुवयांचे कंगोरे
लाघवी लाघवी पाहणे
नथनीचे झगमगणे
केसांचे भिरभिरणे
गंधीत झाले गं जगणे
स्वप्नांची तू परी
तू परी स्वप्नांची

स्वप्नांच्या झोख्यावर
आकाशाची चक्कर
डोळ्यांच्या ज्योतींनी
झगमगले सगळे घर
जिद्दीचे हट्टाचे
चेहऱ्यावर सापडणे
तू दिसता हृदयाचे
धडधडधड धडधडणे

डोळे ते टप्पोरे
भुवयांचे कंगोरे
लाघवी लाघवी पाहणे
नथनीचे झगमगणे
केसांचे भिरभिरणे
गंधीत झाले गं जगणे
स्वप्नांची तू परी
तू परी स्वप्नांची

तुषार जोशी, नागपूर
+९१ ९८२२२ २०३६५
१५ जुलै २०१२, १७:२० 

तुझ्या चांदण्याने

(छायाचित्र सौजन्य: स्तुती
.
.
तू हसतेस आणि भरतेस
घराला तुझ्या चांदण्याने
तू उरतेस स्मरण होऊन
क्षणाक्षणाने कणाकणाने

तू बघतेस तुझ्या टपोऱ्या डोळ्यानी
चष्म्याच्या पारदर्षक काचांतून
माझ्यासाठी कवच ठरतेस सोडवतेस
मला जगाच्या खोचक जाचांतून
तुझे असणेच आश्वासन ठरते
जगण्याचे औषधा प्रमाणे

तू बसतेस जिथे टेकवतेस डोके
त्या जागा होतात माझे देव्हारे
तू नसतानाही त्या जागा असतात
माझे विसावण्याचे शांत किनारे
तुझ्या केसांचा गंध भेटतो
मला सुखाच्या अत्तराप्रमाणे

तुषार जोशी, नागपूर
+९१ ९८२२२ २०३६५
१५ जुलै २०१२, १२:५०

बुधवार, ११ जुलै, २०१२

धून

(छायाचित्र सौजन्य: सीमा जोशी)
.
.
एक वाऱ्याची झुळूक येते, केसांना उडवून देते
तुझे रूप खुलवून जाते
केसांच्या जाळी मधून, मन हे तुला पाहताना
धुंद होते.

पाऊस येणार आहे, रोमांच देणार आहे
दवबिंदूंचा पानोपानी श्रृंगार होणार आहे
अश्या भारलेल्या क्षणांना तुझी साथ लाभून जगणे
सुखाने खरे धन्य होते

बघणे तुझे प्रीत भोळे, सागर खोलीचे डोळे
ओठांचा मिश्कील छंद, सावली उन्हाचे जाळे
धरून ठेऊ कसे मी, तडतडते काळीज माझे
तुझ्या प्रीतीची धून गाते

तुषार जोशी, नागपूर
+९१ ९८२२२ २०३६५
११ जुलै २०१२, २३:३०

मंगळवार, १० जुलै, २०१२

बोलके डोळे

(छायाचित्र सौजन्य: शाकल शुक्ल )
.
.
तिचे स्मितं हास्य तिचे बोलके डोळे
निरागस सौंदर्याचे मधाळ पोळे
तिचे बोलके डोळे

जिथे जाते लोकांना आपले करते
सर्व नात्यांसाठी आदर्श ठरते
धीट कमालीची जरी हृदय भोळे
तिचे बोलके डोळे

तिच्यासाठी जग तिचे खास लोकांचे
फुलविले हौसेने बगिचे स्वप्नांचे
उंच जाती तिच्या कल्पनांचे हिंदोळे
तिचे बोलके डोळे

तुषार जोशी, नागपूर (+९१ ९८२२२ २०३६५)
१० जुलै २०१२, ००:३०

बुधवार, ९ मे, २०१२

खंत

(छायाचित्र सौजन्य: रिद्धी )
.
.
किती तुझ्याशी खेळलो
लपाछुपी घर घर
दिवाळीतल्या किल्याला
तुझीच कलाकुसर

कधी दुष्टपणा मधे
भांडलो विना कारण
तरी तुझे दादा दादा
माझ्याभोवती रिंगण

राखी बांधून देताना
तुझा उजळे चेहरा
निरागस मनोहर
आनंदाचा माझा झरा

तुझे प्रत्येकच गोष्ट
मला येऊन सांगणे
आठवते माझ्यासाठी
तुझे काळजी करणे

कशी समाजाची रीत
तुझे होईल लगीन
खंतावते माझे मन
उरे भांडायाला कोण

तुषार जोशी, नागपूर (+९१ ९८२२२ २०३६५)
०८ मे २०१२, २२:२२
.
.

प्रार्थना

(छायाचित्र सौजन्य: गौरी )
.
.
ती हसते आणिक
पसरवते आनंद चारी दिशांना
ती दरवळते अन्
गंधित करते कोमेजल्या मनांना

ती फूलून येते
पाहुन तिजला ताजे परिसर होती
बघता बघता पक्षी
मंजुळ मंजुळ गाणे गाती

ती खाण सुखाची
फुलवत जाते हास्यरसाच्या बागा
दुःखाला वा
वेदनेला उरतच नाही जागा

पण डोळ्यांच्या
कडांमधे का पाणी भरले आहे
ती काय सोसते
काय तिच्या नशिवात दडले आहे

लवपून व्रणांना
वाटत फिरते मखमाली दिलासे
वाटेस येऊदे
तिच्याही (देवा) सुखस्वप्नांस जरासे

तुषार जोशी, नागपूर (+९१ ९८२२२ २०३६५)
०९ मे २०१२, ००:३०


शनिवार, ५ मे, २०१२

तुझे हासणे

(छायाचित्र सौजन्य: किशोर )
.
.
तुझे हासणे जीव मोहून गेले
कधी ना कळे भान ओढून नेले

किती काळजाला बजावून होते
नको प्रीत त्याने खुळे चित्त होते
तुझे रांगडे रूप दृष्टीत आले

तुला पाहण्याचा लळा लागला रे
कशाला असे पाहतो सांग ना रे
कटाक्षात तू प्रीत घायाळ केले

तुषार जोशी, नागपूर (+९१ ९८२२२ २०३६५)
०५ मे २०१२
.
.

बुधवार, २ मे, २०१२

आठवण


.
.
तुझ्या खरखरीत दाढीची
रोमांचवेडी आठवण
स्पर्षताच मोहरणारा
माझा कण अन कण

तुझे कपाळावर रूळणारे
केस बिनधास्त
फुंकर मारताच उडून जागेवर
याचचेच मस्त

तुझे डोळे लपवणारा
तो दुष्मन गॉगल
तरीही तो आवडायचा
मीच पागल

तुझ्या मिश्किल ओठांवर
आलेलं माझं नाव
त्या मनोहर अणुभवाने
दाटून आलेले भाव

तुला आठवायला लागलं
की सगळंच आठवतं
तुझं जवळ नसण्याचं शल्य
खोलवर जाणवतं

तुषार जोशी, नागपूर (+९१ ९८२२२ २०३६५)
०१ मे २०१२
.
.

सोमवार, ३० एप्रिल, २०१२

उत्सव

(छायाचित्र सौजन्य: वृंदा )
.
.
मला किनई एकदा तुला
माझ्याशीच फोनवर बोलताना पाहायचंय
'मला तू आत्ता पाहिजे'
हे जसं तू फोनवर म्हणतेस ना
ते कसं दिसतं ते टिपायचंय.

मी जेव्हा म्हणतो की
'तू सुगंधाची कुपी आहेस'
तेव्हा तू लाडिक हसतेस
काय दिसत असशिल गं तेव्हा!
ते दिसणं सुद्धा मला मनात साठवायचंय.

तासनतास माझ्याशी बोलताना
शुन्यात बघत असशील
वारा तुझ्या केसांशी खेळत असेल
देहभान विसरत असशील
ते चित्र एकदातरी हृदयामधे जपायचंय

मी तुला आज
तू दिसशील त्या अंतरावरून
करणार आहे फोन, आणि
तुला बोलताना बघण्याचा
मंत्रमुग्ध उत्सव साजरा करणाराय.

तुषार जोशी, नागपूर
+९१ ९८२२२ २०३६५
३० एप्रिल २०१२, ०८:००
.
.

रविवार, २९ एप्रिल, २०१२

सागर

(छायाचित्र सौजन्य: प्राजक्ती )
.
.
तुझ्या नजरेच्या लाटांमधे
मी चिंब होतो आणि
तुझे ते मंद स्मित करते
काळजाचे माझ्या पाणी

कधी गंभीर चेहरा देतो
वादळाची ही शक्यता
मी अडकतो बुडतो गं
अचानक बघता बघता

या भरती ओहटी मध्ये
किती सोसतेस गं सांग
मी रोज अनुभवतो ना
तू सागर एक अथांग

ही ओढ मनाला कुठली?
वेडा आवेग हा कसला?
मी पणाचा किनारा
अलगद माझा सुटला

तुषार जोशी, नागपूर
+९१ ९८२२२ २०३६५
२९ एप्रिल २०१२, ००:००
.
.

शुक्रवार, २७ एप्रिल, २०१२

माझे स्वप्न

(छायाचित्र सौजन्य: प्राजक्ती )
.
.
माझे बालपण जणू
माझ्या घरात रांगले
माझ्या लेकीच्या रूपाने
सुख पदरात आले

आनंदात घर न्हाले
जागा नाही दुःखासाठी
गोड गोड अमृताचे
किती बोल हिच्या ओठी

विसरते सारे काही
हिने आईगं म्हणता
सरे माझा शीण सारा
हिने घट्ट बिलगता

किती लाड करू हिचे
कशी दृष्ट काढू बाई
माझे स्वप्न पुरे झाले
जेव्हा झाले हिची आई

तुषार जोशी, नागपूर (+९१ ९८२२२ २०३६५)
२७ एप्रिल २०१२, २२:४०
.
.

बुधवार, २५ एप्रिल, २०१२

सुखाची फुले

(छायाचित्र सौजन्य: रिधिमा )
.
.
तुला पाहिले मोकळे हासताना
मनातून ते चित्र जाईचना
दिशा धुंद झाल्या ऋतू गुंग झाले
असा थांबला काळ हालेचना

तुझे रूप आहे जगा वेगळाले
मला ठाव होते कधीचे तरी
तुला पाहताना पुन्हा जीव जाई
किती वादळे जन्म घेती उरी

कसे ते कळेना तुला भेटताना
सुटे जाण माझ्या जगाची मला
तुझ्या चांदण्यातून वेचून घेतो
सुखाची फुले रोज माळायला

तुषार जोशी, नागपूर (+९१ ९८२२२ २०३६५)
२५ एप्रिल २०१२, १०:३०
.
.

मंगळवार, २४ एप्रिल, २०१२

समाधान

(छायाचित्र सौजन्य: विश्वेश )
.
.
मिळाले तुझे चित्र तो नायगारा
तुझ्या त्या यशाने सुखी जाहले
असे नित्य आनंद वेचीत जावे
सदा तू मनाला पुन्हा वाटले

तुला पाहुनी रोज वाटे मनाला
तुझ्या पास यावे खुळ्या सारखे
तुझे चित्र आहेच हातात माझ्या
तरीही तुझे हासणे पारखे

म्हणावेस तू की निसर्गात राणी
तुझ्यासारखे गोड काहीच ना
कळावे मला हे तुझे प्रेम आहे
तरीही समाधान वाटे मना

तुझ्या बाजुला घट्ट बिलगून द्यावी
अशी पोज चित्रात राहील ती
कितीदा मनाला बळे आवरावे
धरावा अता धीर राजा किती

तुषार जोशी, नागपूर (+९१ ९८२२२ २०३६५)
२४ एप्रिल २०१२, १०:२०

.

सोमवार, ९ जानेवारी, २०१२

तू हसतोस

(छायाचित्र सौजन्य: वैभव )
.
.
तू हसतोस..
आणि सुगंध पसरतो
चोहिकडे, दिशादिशांत, नसानसात
रोमकाटा होतो

तू उरतोस...
मनाच्या सर्व पाकळ्यांमधे
मन उमलू लागते, फुलते
प्रसन्न होते

तू असतोस..
आसपासच
जाणवतात नेहमी पदन्यास
डोळे मिटताच अणुभवते मी
तुझेच श्वास

तू हसतोस…
आणि करतोस
माझे जगणे निरामय
तू औषध आहेस रे
माझ्या जगण्याचे

तुषार जोशी, नागपूर
१० जानेवारी २०१२, ०१:००
+९१ ९८२२२ २०३६५
.
.