रहस्य

(छायाचित्र सौजन्य: गौरी )

.

.

अंधारात प्रकाश करेल
आयुष्यात सुवास भरेल
असे तुझे चैतन्य परसवणारे
मनमोकळे हसणे
तुझं मनभरून हसण्याचं
रहस्य जाणण्यासाठी
तुझ्याच जवळ हट्ट करताच
तू मला आश्रमात घेऊन गेलीस
त्या निरागस पिल्लांची ताई होऊन
त्यांच्याशी खेळताना
मला बाजूला बसून बघ म्हणालीस
आणि मला कळले
की तुझे मनमोहक हसू
हे तर चांदणं आहे
तू तुझ्या स्नेहाने फुलवलेल्या
त्या छोट्या छोट्या अनेक
सूर्यांचा प्रकाश परावर्तित होऊन
तुझा चेहऱ्याचा चंद्र
तेच चांदणं सभोवताली पसरवतोय
आणि म्हणूनच
तुझ्यासोबत राहणं म्हणजे
एक आनंददायी अनुभव ठरतोय.

~ तुष्की
नागपूर, १७ आगस्ट २०१३, ११:१५