पौर्णिमा

(छायाचित्र सौजन्य: करूणा )

.

.

तुझा चेहरा पाहुन कळले
चंद्र हाच आहे
आकाशीजो चमचम करतो
फक्त भास आहे

तुझे चांदणे पडता येतो
उत्साहात ऋतू
तू असण्याचा दरवळ पसरे 
सुगंध उत्कट तू

तीळ हनुचा मनात भरतो
क्षणोक्षणी उरतो
तू हसल्यावर अंकुर अंकुर
वसंत मोहरतो

टपोर डोळे गाल फुलांचे
ओठ पाकळ्यांचे
डोळ्यातच बुडताना होते
सार्थक बुडण्याचे

भास म्हणालो त्या चंद्राला
खास तूच चंद्रमा
गोड हासली लाजुन झाली
जन्माची पौर्णिमा

~ तुष्की
नागपूर, १० सप्टेंबर २०१३, २२:४०